Khaw nge tun tum chu mi thenkhatten zu that lohzia an sawi fo bawk a, zu tantute lamah kan tang lawk teh ang. "Khawtlang Nun Siamthat" tih thupuiah kan neih bawk a, hetiang zawng hian zu thatna lampang te ka’n sawi hlauh teh ang. A che che sih hlawkah tih ang deuhin a hua huain mahni inen fiah nan leh insiam that nana hmanah kan ti a ni ang chu.
01. Chatuan hremhmuna min hruai luttu atan a tha.
02. Pathian min hlattirtu atan a tha.
03. Kan nun titawitu atan a tha.
04. Kan taksa hriselna tichhetu atan a tha.
05. Kan nun zahawmna tichhetu atan a tha.
06. Kan chhungkaw nun hlimna tichhetu atan a tha.
07. Kan inchhung khur tihrehawmtu leh tiralkhela tithlabara tiralmuang lotu atan a tha.
08. Nupui fanaute leh midangte anchhe deuh deuha tawng khumna atan a tha.
09. Chhungkaw titlarantu atan a tha.
10. Chhungkaw timualphotu atan leh keh darhna thlentu atan a tha.
11. Kan harhfim laia kan tih duh loh leh kan sawi duh lohte min tihtirtu atan leh min sawitirtu atan, pawi min khawihtirtu atan a tha.
12. Thlengthlawkthei siamtu atan a tha.
13. Mahni eng vak mah ni si lova ropui tak ni anga min ngaihtirtu leh min tichapotu atan a tha.
14. Mite nuihza bura min siamtu atan a tha.
15. Thil tha lam thlentu aia a tha lo lam thlentu atan a tha.
16. Insum theihna keimahnia kan neihte min tichhetu atan leh min titlachhamtu atan a tha.
17. Uirena siamtu leh thlentu atan a tha.
18. Chhungkua leh khawtlang nun mawina tichhetu atan leh timualpho fotu atan a tha.
19. Ram hmel mawina leh zahawmnate tihmelhemtu atan leh tihmai mawka timualphotu atan a tha.
20. Nu leh pa leh unaute leh chhungkhat lainate zak ngawih ngawiha siamtu atan leh timualphotu atan a tha.
Awle, tuna kan han tar lan takte hian, hmelmapa - bumtu, setana leh a tirhkoh ramhuaihote hian keini Pathian hmangaihna avanga kan sual tlan nana a thisena min hringa min tlantu kan hriat lohna tura min bum a, kan thlarau nun min tihchhiatsak bakah kan rilru leh taksa, inchhung khur nun, kohhran leh khawtlang, pawl hrang hrangte min tihchhiat vek hi an tum a nih avangin min bumna hmanrua lakah hian inthiarfihlima kan nun kan hman theuh theih nan kan puan vente sawi chhingin i tang theuh teh ang tiin ka sawm che u a ni e.