Zofate Society-a thil inhnawn luih – Budget tibuaitu

- J.Khuma

Tape Cassette an release a, min rawn hnawn a, mipui kara chetla zawk thin tih takah lak loh hreh zawkah tan a lo ngai. Chumi nghawng chu nithum li vel nu ber nena in ngur a ni. Faten thil tihsual nei mauh si lovin vin leh vau an tuar. Thahnem ngaih vang erawh a ni lawi si. A va buaithlak tak em.

Baby Home tanpuina an ti a, Kawl Bible an rawn zuar leh. Pahnih lai kan lo nei tawh bawk tak nen. Nu ber chuan ‘Pawisa kan nei lo,’ a lo ti leh hmiah tawh. “A ba pawhin a theih, min laksak hram rawh u,” an ti leh a. Aw, engatinge ka awmlai hian thil hnawn tur ho hi an lo kal theih viau chu ni le! Huihah. Rawngbawlna a ni nghal mai a, an ti leh talh a. Nu ber lahin ‘Rawng te chu kohhranah pawh kan bawl reng a, Baby home hminga sahbawnphut zawrhte pawh rate pangngai pel dawrhin kan lo leisak chamchi, ram thim tan faitham kan tham fova, EM thawhlawm kan chhang bawk a, Nuho phei chuan lawmbawm kan ti a, rawngbawlna vek, pa ber lah MYA-ah a la tel a, Krista Chanpual an rawn tithla zen bawk nen, chu lo pawh Mas dawnah phei chuan Carol an tam a, kohhran pawlho tih a nih avangin rawngbawl nan an hmang a, tah pawh kan pe fo,’ a la ti ta duah. Awmhmuna khukral a chakawm thin. A chhan ber chu pa berin cheng kan thawkchhuak hneh lo hi a ni zel awm asin, lehlamah chuan. Nu ber pawh uikawm lutukah kan han chhuah thelh chule!

Calendar tih vel leh Chanchin bu tih vel lah hi Zofa hnam peng tin hian er tehah kan neih em ni chu, tih tur khawpin kan tichhuak zut a, thil tha lo phei zawng kan ti a ni hauh lo. A buaithlak ber chu a thlawna kan sem thei si lo hi a ni. A hnawn hmasak berah hian kan han tang leh phawt thin a. Nu ber awm loh laia min rawn hnawn hian a zia awm a, ka awm loh laia nuber hnena an lo hnawn hian a zia awm ber, chhungkaw budget tan chuan. Huaisen a ngai teh e, hemi sawi tur pawh hian…Hm thih leh thih.

Ennawm fahran lem lo rawngbawlna film te, kohhran bil service record te khaw bil leh kohhran bil jubilee te leh tawngtai tlang tih vel film CD in kan siam bawk. Kan in hnawn leh ta. A to lutuk phei zawng a ni lo. Mahse nitin cheng hmanna tur budget siam saah khang leina tur kha a tel thin si lova. Thla tawpah naupang ziak loh puan leina account head-in a lo tuar phah a. Naupang an phun nawi. A nih loh vek pawhin Pa ber RTC emaw KCP emawin a tuar a. Chuti a nih loh vek pawhin mi chhiat that tawha kan tawrhpuina leh kan lawmpuina tih tlem a lo ngai. Rawngbawlna leh rawngbawlna head kha a insu buai a, a sum lutin a hneh miau loh avangin. Eng rawngbawlna nge ni zozai le. Kan phurnaa thil kan buatsaih hi rawngbawlna hming kan puttir a, khawtlanga chhungkaw tin budget hi kan tibuai ta em ni, han ti ila, uar lutuk chan kan chang ang reng dawn si, eng pawh nise a tul tak tak chauh ti ila, emaw a huang chin tur chauhte hnawn tal ila, nge kan la ti zel dawn zawk? Ngaihtuah chian erawh a tul ta a ni.

Thulakna: https://chhaktiangthalaiarsi.ning.com