‘Zo Clinic’ beihpui an thlak mek
Baptist Church of Mizoram hnuaia R&D Department atanga 'Zo Clinic' Malaria beihpui thlakna Lunglei District-ah kalpui mek a ni. He Zo Clinic hi Lunglei District a khaw 46 ah kalpui mek niin, heng khua ah te hian Malaria vei leh vei loh uar zawka en a ni a.
Malaria enna Microscope an dawn vek mai bakah, Zunthlum enna leh rulchuk enkawlna a tul dan angin neihpui nghal zel a ni. Heng khaw 46-a Technician dah te hi BCM R&D leh Civil Hospital tangkawp a training nei te an ni a. Hengte hian zunthlum enna leh Rul chuk enkawl dan zir nghalin, mahni khua-ah theuh a tul dana thawk thei turin zirtirna pek vek an nih angin an thawk ang. Tuna an hmalakna khua bakah hian tunthla vek hian khaw 14 ah bul tan that leh tura hmalak mek a ni.
Tun tuma Malaria beihpui BCM R&D 'Zo Clinic' hnuaia neihah hian a bik takin Lunglei khawthlang lam Samuksuri khuaah chuan mi 42 Malaria exam-ah mi 30 in Malaria an vei a. Thisen exam zawng zawng zinga 71% in an vei tihna a ni. Heng mite hian 'Zo Clinic kaltlang hian enkawlna an dawng vek a, hei vang hian Malaria vanga thi an la awm lo a ni. An khawtlang hruaitute pawh an lawm hle a ni. Tun thlenga khaw hrang hranga 'Zo Clinic Malaria beihpui' ah hian thisen lak tawh mi 23,000 atangin Malaria vei mi 5,200 hmuhchhuah tawh an ni bawk.
Thulakna: Ralvengtu
