Zirchianna: Meizial Khu Hipchhawn Vangin Kum Tin Mi 600,000 Thi

Ni 26 November 2010, Zirtawpni:  Mitthi mi za-a pakhat (1% ) chu meizial zute atanga chhuak meikhu hipchhawngtute ( second-hand smokers / passive smokers ) an ni a, kum tinin meizial khu hipchhawn avangin mi 600,000 an thi thin, niin Khawvel Pum Hriselna Lam Buaipui Pawl ( WHO –World Health Organization ) zirchianna chuan a tarlang. He zirchianna hi meizial khu hipchhawn chungchang zirchianna hmasa ber a ni.

Dr. Annette Pruss-Ustun kaihhruai uluk taka zirchiangtu mithiam rualte chuan ram hrang hrang 192 chu uluk takin an zirchiang a, kum 2004 khan meizial khu hipchhawn avanga thi mi 600,000 zinga 40% chu naupang, 33% chu zial zu lo kum tling tawh mipa, 35% chu zial zu lo kum tling tawh hmeichhia an ni tih hmuhchhuah a ni.

Kum tin meizial khu hipchhawn avanga thi 600,000 zinga hmun thuma then hmun khat  (33.3% vel ) chu naupang an ni a, kum tinin naupang 165,000 vel meizial khu hipchhawn avangin an thi a ni. Meizial khu hipchhawn avanga thihna zinga hmun thuma then hmun hnih (66.6% vel ) chu Asia leh Africa khawmuala thleng a ni.

Zirchiangtu mithiamten an chhut danin, meizial khu hipchhawn atanga natna-in thihna a thlen dan chu hetiang hi a ni:-

·    Meizial khu hipchhawn vanga lo awm lung lam natna (heart disease ) avangin mi 379,000 an thi.

·    Meizial khu hipchhawn vanga lo awm thaw thawkna lam chian lohna / thaw hah leh chham (lower respiratory infections ) avangin mi 165,000 an thi.

·    Meizial khu hipchhawn vanga lo awm thaw chham natna chi khat asthma avangin mi 36,900 an thi.

·    Meizial khu hipchhawn vanga lo awm chuap cancer (lung ) avangin mi 21,400 an thi.

Thulakna: Reuters & BBC