YMA, MUP, MHIP leh MZP-te'n Tuikuk chungchang an sawiho

Mizorama tlawmngai pawl lian pali - YMA, MUP, MHIP leh MZP office bearer-te chuan nimin khan Central YMA Office-ah Tuikuk lâk let tur chungchang an sawiho a; Tripura relief camp-a Tuikuk awmte zingah, kum 1995-a Intensive Revision of Electoral Roll-a hming chuangte leh an thlahte chauh Mizorama lâk kîr an remti tih an puang.

Tlawmngai pawl palite hian kum 2003-a tlawmngai pawl leh Mizorama political party zawng zawngin lungrual taka thu an lo dah tawh, kum 1995-a Intensive Revision of Electoral Roll neiha Tuikuk hming chuang leh an thlahte chauh lâk kîr ni se, an tih chu an dinna ngai reng a la nih thu an puang a ni.

Tlawmngai pawlte chuan, kum 2006-a NGO Coordination Committee thurel, Tuikuk lo kîr turte chu hmun khata dah loh ni se, tih te; tum khatah mi 300 aia tam lâk kîr loh a, khaw hrang hranga dah ni se, tih te; Tuikukte'n ralthuam an chelek a, Mizo nunaute an la rîkrâp chhung chuan lâk kîr loh ni se, tihte an lo rel tawh chu sawi langin, hengahte hian an dinna ngai rengah la din thu an sawi.

Tlawmngai pawlte chuan, Tripura Sakhan tlangdunga Mizo awm, Tuikukte'n an ûm chhuah avanga an sahim nana Mizorama lutte chhawmdawlna tur sorkarin tun thlenga a la pe lo chu hriatthiam harsa an tih thu an sawi a; heng Mizo, Tuikukte hlaua tlanchhiate hi an phú tâwk chhawmdawlna pe turin sorkar an ngen tih an sawi bawk.

He inhmuhkhawmna hi Central YMA President, Lal­chung­nunga'n a kaihruai a; sawihonaah chuan, Tuikuk chungchangah hian Mizoram sorkar chu muthlu rei an hriat thu te, tlin duh avanga Tuikukte vote neihtir thin a ni chu pawi an tih thute an sawi a; Mizote'n duat taka Pathian thu hrilh a, lehkha zirtir laiin, Tuikuk zinga a fing hmasa apiangin Mizote an do lêt hmasak thute pawh an sawi a ni.
Tlawmngai pawlte hian an sawihona boruak leh an duh dan leh dinnate chu sorkar hotute la sawipui an tum a ni.

Thulakna: Vanglaini