WORLD CUP THLIRVELNA
From Chhaktiang Zofa Zirlate Groupmail
History
Fifa World Cup Tournament hi Khawvel ram hrang hrang 174 te’n an lo khel tawh a; Ram 18-in an lo thleng (IN neitu chan an lo chang) tawh a ni. Brazil hi World Cup Trophy chawi ngun ber Ram an ni a; tum 5 meuh an lo chawi tawh a ni. Italy-in Champion nihna Trophy tum 4 an chawi tawh a, West Germany-in tum 3, Argentina leh Uruguay-in tum 2 ve ve an lo chawi tawh a ni. England leh France hian tum 1 ve ve an lo chawi tawh bawk a ni.
FIFA World Cup Tournament hmasa ber chu Kum 1930 a ni a. Chu World Cup hmasa ber chu Uruguay-in a thleng (IN neitu chan an lo chang) a, FIFA World Cup champion hmasa ber nihna a hauh nghal bawk a ni. Khawvel Ram hrang hrangte inkalpawhna a la that tawk loh avangin, Ram 13 chauh an tel thei a. Europe atang Uruguay thleng tur hian chawlhkar thum lai lawnga kal a ngaih avangin European ram-te hi an tel tam thei ta lo a ni.
A hnuleh, 1934 FIFA World Cup chu Italy-ah nghah a ni a. A thlengtu, Italy hian champion nihna Trophy chu chawi ve lehin, Euroupe Khawmualpui zinga champion hmasa ber nihna chu a hauh ta a ni. 1934 World Cup-ah hian 1930 World Cup-a champion, Uruguay chu a tel ve duh ta lo. 1930 World Cup, Uruguay-a nghah tum khan Euroupe ramte’n an hlutsak vak lo anga an ngaih avangin an tel duh ta lo a ni. Uruguay hi mahni Title humhim duh lo awmchhun a ni nghal bawk ani.
1938 FIFA Wold Cup chu France-ah nghah a ni a, Italy-in a tum 2-na atan champion Trophy an chawi leh a ni. 1950 FIFA World Cup chu Brazil-ah nghah a ni ve thung a, Uruguay-in a tum 2-na atan champion Trophy an chawi ve leh bawk. Ti chuan, 1954 FIFA World Cup-ah West Germany an champion a,
1958 leh 1962-ah Brazil,
1966-ah England,
1970-ah Brazil,
1974-ah W.Germany,
1978-ah Argentina,
1982-ah Italy,
1986-ah Argentina,
1990-ah W.Germany,
1994-ah Brazil,
1998-ah France,
2002-ah Brazil,
2006-ah Italy te an lo champion a ni.
2010 FIFA World Cup
South Africa 2010 FIFA World Cup, FIFA-in a buatsaih tum 19-na tur hi June 11, 2010 atang July 11, 2010 thleng tur a ni dawn a. Ram hrang hrang, ram 32 an tel dawn a ni. FIFA chuan, 2010 FIFA World Cup khel tur Ram 32 te lawm-man atan hian sum, $ 420 million lai a ruahman a, hei hi 2006 FIFA World Cup aiin 60% laiin a tam zawk a ni. 2010 FIFA World Cup khel tur team zawng zawng hnenah, FIFA chuan inbuatsaihna’n tiin $ 1 million theuh a pe tawh a. Group Stage paltlang lote’n $ 8 million theuh an dawng ang a, Round of 16 (2nd round) lutte hian $ 9 million an dawng dawn bawk a. Quarter Final thleng hnenah $ 18 million, Semi Final thleng pha chin hnenah $ 20 million, Runner’s Up (pahnihna) hnenah $ 24 million pek a ni ang a, pakhatna (champion) hnenah $ 30 million pek a ni dawn bawk.
Inkhelh huna an ball hman tur hi ‘Jabulani’ a ni a, Adidas company siam a ni. A awmzia chu, ‘Mi tin tan lawman thlentu’ (bringing joy to everyone) tihna a ni.
Tlip-na
2010 FIFA World Cup tiropui zualtu tur chu, FIFA World Cup tum 18 neih tawha ‘World Cup Trophy’ lo chawi tawh, champion nihna lo chelh tawh, Ram zawng zawngte an tel kim vek dawn hi a ni.
(Tarlan tur a tam hle a; mahse, thian dangte tih atan khek tawh mai ang.)
Thulakna : ‘World Cup Mania 2010’ (Buatsaihtute – Malsawmkima, Lalhruaitluanga, Laltleipuia Hmar)
