“Thu Sawm Pek (Mosia Dan)-a kan hmuh ‘Uire suh ’ tih leh ‘Facebook hmang suh ’ tih hi a inang a ni,” tiin United States - New Jersey, Living Word Christian Fellowship Pastor Cedric Miller-a chuan a sawi.
Rev. Cedric Miller-a chuan thlaruk chhungin a kohhran member 1,100 zinga nupa tuak 20 chuan Facebook hman luat vangin nupa nunah buaina an tawk, niin a sawi. Chung buainate avang chuan Rev. Cedric Miller-a chuan inneihna lam buaipuitu kohhran upa 50 hnenah an Facebook account delete turin thu a pe a, chuti a nih loh chuan an nihna ata inhnukdawk turin a ti a ni.
Rev. Cedric Miller-a hian a kohhran member nupui pasal nei tawhte hnenah an Facebook account titawp turin a ti a. Amah pawh hian a fa 6-te nen in biak pawh nan Facebook account a nei ve a, ama thu ngei zawmin chu a Facebook account chu a ti tawp dawn a ni.
An kohhrana minister pakhat Pat Dawson-i pawhin a chhungte thlalak en nan Facebook account a nei a, nimahsela, ani hi chu pasal la nei lo a nih avangin a account delete tura tih a ni ve lo. Pat Dawson-i hian Facebook-in nupa nun a khawih buai chungchanga Rev. Cedric Miller-a ngaihdan hi a thlawp hle.
Rev. Cedric Miller-a hian, “Facebook hi a hmang thiamte chuan tangkai takin an hmang a, thil tam takah a tanpui a. Nimahsela, hmang thiam lohna hi a nasa em a ni,” a ti.
Tunah hrih chuan Rev. Cedric Miller-a ngaihdan leh kalpui dan chungchangah Facebook –in chhanletna a la tichhuak lo.
Thulakna: Fox News & The Globe and Mail