U.S. leh Chhim Korea-in Ral Beih Zir,Korea Buaina Kal Zel

Khawvel inhmelma kumhlun Chhim leh Hmar Korea innghirnghona kal zel karah ni 28 February 2011 khan U.S. leh Chhim Korea chuan sipai ral beih zir insawizawina (indo lemna) an tan leh ta vut vut mai. Hmar Korea-in Chhim Korea khawpui Seoul chu “tui meivap”-ah a chantir tur thu sawia a vau atanga ni khat pelhah U.S. leh Chhim Korea chuan he ral beih zir insawizawina hi an tan nghal a ni.

Tun tum ral beih chhin insawizawinaah hian Chhim Korea sipai 200000 leh Korea ram pawn atanga koh luh U.S. sipai 12800 vel an che vel ang a, hmelmaten Chhim Korea chu khawi lam atang pawha an beih huna inven dan leh beih let dan zirin an tichhin dawn a ni. He insawizawina hian ni 11 chhung a awh ang a, insawizawina thenkhat erawh April thla nawi lam thleng chhunzawm a ni ang. U.S. leh Chhim Korea tangkawp chuan he insawizawina hi tun hnaia thil thleng avanga nei an nih loh thu leh tun hma atanga an lo ruahman lawk thil an nih thu an sawi na a, khawvel mi tam tak chuan hei hi Hmar Korea vauna leh chona a nih an ring. Hmar Korea chuan U.S. leh Chhim Korea ten ral beih leh indo vel an tihchhin fona hian Nuclear indopui a nghawng chhuah mai tur thu sawiin a vau let nasa thin.

Tun Tum Buaina Hi

March 2010 khan Hmar Korea chuan Chhim Korea ral beih lawngpui a bomb pil a, Chhim Korea mi 46 zet an thi. Inepna a nasa tan hle. Ni 25 – 28 July 2010 awh Tuipui eng (yellow sea) leh Japan tuipui-ah America chu chhim Korea ram nen tui lam leh van sang lam ral beih dan zir insawizawina (indo lemna) a nei nghal. He America leh chhim Korea ralbeih zir indolemnaah hian USS George Washington ralbeih thlawhna phur lawng lian leh lawng lian dang leh tui hnuai lawng 20 , thlawhna 200 leh sipai 8000 an che vel a, U.S. thian tha Japan pawhin a tawiawm bawk.

Ni 3 August 2010-ah  ni 5 awh “Vanguard-2010” tih hmingpu van sang lam ralbeih dan zir insawizawina, U.S. leh Chhim Korea chhanlet nan China chuan a nei ve nghal. He van sang lam beih thut laka inven dan zir insawizawina-ah hian lei lam sipai leh tui lam sipai 12000 aia tlem lo, thlawhna , ralbeih thlawhna , helicopter 100 leh van boruak missiles laka invenna leh ralthuam dangte hman a ni.

Ni 5 August 2010-ah ni 5 awh tuihnuai lawng nen inkungkaih sipai indo zir insawizawna, Yellow Sea-ah U.S. leh Chhim Korea ten an nei leh. Hetah hian sipai 4500 , lawng lian leh tuihnuai lawng 20 aia tlem lo leh ralbeih thlawhna 50 te an hmang.

Ni 16 August 2010-ah U.S. leh Chhim Korea chuan ni 10 awh sipai ral beih zir insawizawina (indo lemna) an nei leh. He sipai ral beih zir indo lemnaah hian US sipai 30,000 leh Chhim Korea sipai 56,000 an tel.

Chhim Korea leh Hmar Korea inepna chu a nasa chho zel a, ni 23 November 2010 khan Hmar Korea chuan Chhim Korea thliarkar – Yeongpyeong chu a kap ta chiam mai a, Chhim Korea lawng sipai 2 leh mi naran 2 an thi a, mi tam takin in leh lo an chan. Vanneihthlak takin ralthuam hmanga inkahna a chhuak chhunzawm ta lo. Chhim leh Hmar Korea te hi vawiin thleng hian na tak takin an invau reng a, ralthuam tihbaiawm pui pui hmangin an intin fur a ni. Chhim Korea lamah U.S. a tang tlat ang bawkin, leh lam Hmar Korea lamah China hi a tang ve tlat bawk a ni.

Chhim leh Hmar Korea Hi

Korean khawmual(peninsula) chu 1910 atang Indopui II-na zawh thlengin Japan-in a awp. Kum 1945-a  Japan sorkar a tlawm chiah khan Korea chhim lam chu American sipaiten an enkawl a, hmar lam erawh Soviet(tuna Russia ram leh ram tam taka lo kehdarh ta) sipaiten an enkawl. Kum 1948-ah Korean khawmual pum huap inthlanna dik leh zalen hlawhchham avangin, Hmar Korea-ah Communist sorkar a lo ding chhuak ta ni. Korea ram pahnih inzawm tura theihtawp chhuaha tan lak a nih laiin, buaina a nasa deuh deuh thung. Tichuan ni 25 June 1950 khan Chhim leh Hmar Korea indopui a lo chhuak ta a ni.

Indonaah chuan Rupublic of Korea (Chhim Korea) lamah UN a tang a, Democratic People's Republic of Korea (Hmar Korea) lamah China leh Soviet te tangin ralthuam leh engkimin an tanpui thung. Nasa taka an indo hnuah, ni 27 July 1953 khan “Inkahhaina thuthlung (armistice)” an ziak ta a ni(‘armistice’ tih hian inkah chawlh zawkna a kawk ber a, ‘peace treaty’ kan tih ang remna leh muanna thuthlung a pha lo a ni).

Thulakna: CNN, BBC, The China Post, Wikipedia, Al Jazeera