November 26 tlai dar 6:05 vel khan Mizoram leh Assam inrina, Kanhmun bula Assam ramri-ah Tripura truck pahnih teak thing phur, Assam pana kal chu Tuikuk hel ni ngeia ngaihte'n an lo tiding a, a ke hma ve ve an kah keh sak a, driver pawisa an chhuhsak bakah an silai kawmin an chhu bawk.
Heng misualte hi hi pasarih an ni a, uniform rang an ha vek a, silai AK-47 an keng a, silai vawi nga vel an hmehpuah bakah driver-te hnenah Tuikuk hel an nih thu leh truck neitute chu Rs. 10,000/- ve ve pe tura lehkha an ziahna chu driver-te hnenah hian an hnuchhiah bawk. Misualte hian driver-te mobile phone an laksak bakah motor document an laksak ve ve bawk a ni.
Tuikuk hel nia rinte hian Mizoram chhunga Kolalian khuaah November 13&14 khan Mizoram IR sipai lambun an tum a, mahse IR-te hian he thil hi an hriat ruk vangin an ti thei lo a, hel-te hian an thil tum an thulh leh nia thudawn a ni. Hemi hnu hian IR camp beih leh an tum a, chumi enfiah tura CID pathum an tirh Tuikuk vekte chu November 16 zan khan IR-te'n an lo man a, Kanhmun Police station-ah an hlan a ni.
Kanhmun Police O/C leh a hote chuan heng Tuikuk hel tirhte thu an zawhfiahnaah IR sipai lambun an tum thu te, an hlawhchham vangin an camp beih tuma an mahni chu enthlatu atan an hman thute an finfiah a. Heng mi pathumte hi November 22 khan Central Jail-ah an rawn dah tawh nghe nghe a ni.
IR sipai lambun emaw, camp beih tuma hma an lak vang hian Kanhmun Police-te chu an O/C hovin petrolling an nei zui nghal a, ramri bul lawka truck pahnih an suasam hma lawk pawh hian Police-te chuan helai hmun hi an tlawh a, an kal bo hnu lawkah truck hi an lo tiding a, an suasam ta nia thudawn a ni. Trcuk an suasam hnu lawk hian Kanhmun khaw mi pathum ulhbun nena ram vak chu hel ho hian Assam ram chhunga Medali khuaah kut thlakin an silai kente chu an chhuhsak nia thudawn a ni bawk.
Thulakna: Vanglaini