Thalaite Kristmas Hman Dan Hi!

- RL Hmangaiha

T in, kumpui sul a lo vei dawn meuh chuan, ‘eng emaw tihhmaih’ emaw, ‘tih tur zawk’ emaw nei ang pui hian kan inhria a. Thenkhat phei chu khawiah mah kal si lo hian an lung a let a, thawmhnaw thar neihte an chak a, tu emaw duh deuhtu tawng dawn ang hrimte hian an inhre thin asin! Chuti anga i awm phawt chuan lawm phawt mai teh.

Tin, Krismas hi lo la run lutuk duh suh. I nghahhlelh ai khan a ho leh dawn. Zanah mi an vak sup sup ang a, Bike-in an inphur parbawr leh vuan vuan ang a, lenkhawmna hmunah “Van Lal Reng ro pialral lunghlu” chhar leh “A pheisen ral a khawm Judai ram vela mi, Chibai bukna rapthlak pek tumin an chhuak ta. I hlim ang, i lawm ang...” kan tih theih phawt chuan arsa sawhchiar kan hawp ang a. A tuk chhun inkhawmah muthlu tluan chhuak zak mah la, a khawma i inkhawm phawt chuan zan lama in lo interekna boruak tha lo zawng zawng pawh inthlahrung lo takin Mas ruai i kil thei ang. Tin, Mas chu a zo ve mai ang.

‘A sen chi’ hlau rawh; huaina thlentu che a ni’ (Chhura 3:7). ‘Beer’ erawh nel suh, ‘Ber’ anga inngaihtirtu che a ni. Bike lek phei chu chuang suh; ‘Baihvai’ taka i chhungte awmtirtu a ni thei. I thlen tum aia hla a thlen mai ang che. Zanah vakin rak rak suh; virus kai i duh i nih nghal lo chuan! Thiante nen thiante inah interek duh suh; i te nghal rek rek ang! (Tawnghriatloh 4:8) Tlangsam par te, Bethlehem par te ngaihtuah la, par dang chu ni danga ngaihtuah atan. Tlangsam par tih lemah ‘A buk hnuaia i partir chuan Krismasah hian Isua piang lovin I sual a lo la piang hlauh dah ang e! Bethlehem par tin lemah ‘Biak-thlem theiha i awm fo chuan an la hem tawlh dawn che!

Mite hi hmang nuam bik angin kan ngai thin. Hmang nuam bik anga kan ngaihte khan hmang nuam bik angin min ngai ve tho. Mi dang kan buaipui a, mi dangin min buaipui. Buai leh buai kan inbuaipui a, kan buai nuaih mai thin a nih hi. Heti ang chiah hian Krismas hman tur tih a awm lo. Mahse, heti ang tak hian hmang ila a tha thei ang bera hman theih erawh kan rilruk vek. Duhthusama hmang, tumah an awm lo, mahse duhthu erawh sam a thiang.

Kerawl hi ke a rawl! Thiante kerawl laia lo rawlbo hi min hre lo emaw in ti ang e, ke in va rawlna hmun atanga min rawn fin leh dawn lai vel hian kan zai tawp chiah emaw nen kan intawng duh khawp mai; Min lawmpui rawh u, ka beram bo ka hmu leh ta e,’ tih tlukin kan lo lawm tho a che u! Kerawl zawh sawhchiar ei dawn meuh chuan, “Thimin lei a tuam laiin, van engine piallei a chhun” tih ang maiin, sawhchiara sa tam deuhna chuhin mei eng an pan leh surh surh duh khawp mai.

Leng kan khawm tha duh ta lo! Tarkhawm a ni ta mah awm e! Leng chu ‘Thalai’ sawina a ni. Nu leh pa kara thalai awmchhun chu var lam arsi ang pheuh pheuh an ni ta zel mai. Nu leh pate lenkhawm chhung zawng thingpui dawr leh hmawmsawm dawr lamah kan lo inhnawh puar a. Tlang rel thang tur khawpa lo interek hran lah chu a mualphothlakin, thalai intichangkang ve chin tan phei chuan a tih chi loh tih kan hre ve zui bawk si. Mahni lo maha lungawi tawh loh nak alaiin,

‘Kan lawm a che lei leh van Lal ropui,

Theihtawpin i fak hla kan sa ang;

Riangvaite leh retheite Lalpa,

H m a n a h Bethlehemah i tan hmun a awm lo;

Tunah erawh i tan hmun a awm kan zingah’ tia lem va chan der lah chu kan thlarau chan hian a han duh lo ve khanglang lawi si a! Mi laklawh, mi hawklak, mi vanduaite hi kan va’n tam duai duai tawh tak em!

Krismas-ah hian Zan hi a ni pui ni, ni zawk awm tak a ni. Zan hi awm lovin chhun angin eng tlang ta ngat se, Krismas hi kan ti saruak ngawt ang! Urlawk zan hian nau piang tur chang niawm takin tlaivar kan tum ve chawt a, lengkhawma kan zai tlaivar a nih loh chuan tlaivarin chhan dang a nei a ni. Hawh u, thalaite hian Setana runluihna hrim hrimah pawh nise, i’n lengkhawm tlut tlut mai teh ang u. Tichuan,

“Hmana miten hmuh an chak ni lawmawm hi,

Hmu lovin sang tam tak an liam ta;

Lal lungawi kum hun lawmawm chhandamna hi,

Keini zawng kan chan bik hi kan vannei hle”

tiin hlim zai kan vawr thei tawh ang.

 Thulakna: Chhaktiang Thalai Arsi, December-2010