THAILAND COURT-IN PM HLUI THAKSIN-A MANNA THUCHHUAH TICHHUAK

Ni 25.5.10 , Thawhlehni khan Thailand Court pakhat chuan an PM hlui Thaksin Shinawatra-a chu rikrapna hmanga buaina chawkchhuaktu-ah puhin manna thuchhuah a tichhuak.Kum 2006-a sipai chakna hmanga paihthlak tak Thailand Prime Minister hlui Thaksin Shinawatra-a hian chawlhkar 9 zet tun tum buaina-ah hian nikhatah $1.5 million zetin eptu pawl / Red Shirts-ho hi a tanpui ru a, a rukin a hawlh reng a ni, tiin Court chuan a sawi.Tin, Court chuan Thaksin-a hian Red Shirts-ho hi Cambodia atangin ralthuamin a tanpui bawk niin  a sawi.Kan hriat theuh angin tun tum buaina-ah hian mi 88 aia tlem lo an thi a, mi 2000 tha velin hliam an tuar a nih kha.

Department of Special Investigations chief Tharit Pengdit-a chuan, Thaksin Shinawatra-a’n tun tum buaina-a chet a lakdan vel zawng zawng hi eptu pawl hotu thenkhat(sorkar-a inpe) te leh hmun dang atangin chhuichhuah a nih tawh a, “a ni chiang a ni” tih finfiahna pawh tha tawk an kawl thu a sawi.

Thailand sorkar chuan ni 19 May atanga a lo chhuah tawh – zan vahchhuah khapna dan (curfew) chu Bangkok leh bial dang 23-ah ni 4 a pawtsei belh leh.

PM hlui Thaksin Shinawatra-a chuan hetianga Court-in a puhna hi dawt a nih thu leh tun tum buaina-ah chhete mah a inhnamhnawih loh thu a sawi ve bawk. PM hlui Thaksin-a hi ni 19 Septembr 2006 khan ram danga a kal hlanin sipai chakna hmangin Thailand sorkarna chu lak a ni.Ni 28 February 2008 khan Thaksin-a chu Thailand-ah a hawng leh a, Court-a an khinna te a hmachhawn a.Mahse, kum 2008 Beijing Summer Olympics thlira  a kal chu Thailand-ah a kir leh tawh lo.Hemi kum vek October thla hian Thailand Supreme Court-in diklo taka hausa leh diklo taka rorel a ni, tiin Thaksin-a chu kum hnih chhung lung in tang turin thu a pawtchat.

Thaksin-a chuan England sorkar-ah raltlan a nihnaa an ram humhimna a dil a, nimahsela, a dilna chu pawm a ni ta lo.Ram hrang hrang a kal kual hnu-ah kum 2009 khan Montenegrin citizenship a hmu.Tunah hian Montenegro leh Dubai velah a khawsa nia hriat a ni.

Thulakna: Al Jazeera , BBC , Wikipedia