Mizo Students’ Union, Shillong chuan University Grants Commission (UGC) in a bituk, tribal lo tan 55% leh tribal tan 50% mark hmu chin tan interview koh theih a tih laia, Mizoram University hnalak chungchanga Vice Chancellor leh Registrar te hmalak dan chu an dem thu sawiin, an thil phut ang an ti hlawhtling lo a nih chuan Vice Chancellor chuan Mizoram chhuahsan se, Registrar pawh vai ramah kir leh mai se an duh thu thuchhuah siamin an sawi.
Nimina MSU, Shillong-in thuchhuah an siamah M.Phil leh Ph.D degree neite chu interview nana tehfung pawimawh ber nise an duh thu te, four first class chu UGC rules a nih loh thu te, Mizo zirlai tam tak, thingtlang school atangin four first class neih a harsat thu te, Mizo IAS zingah pawh four first class nei an tam loh thu te sawiin, hetianga dan khirh tak siam hian mibeidawng a siam belh theih dawn avang leh silai chelek mai te a hlauhawm theih thu leh he dan hi tihtawp an duh thu an tarlang a. Hna ruak pakhat zelah Mizo diltu tling an awm chuan mi paruk tal ko tura an duh thu tarlangin, an duh anga a kal lo a nih chuan University Vice Chancellor chu a rang thei ang bera a ban an phut thu leh Registrar pawh vairama kir leh mai tura an duh thu an tarlang bawk a ni.
Thulakna: The Zozam Times