SAKAWLH KA HLAU

- Robert Thangmawia

Pathian thu zirmi ka ni lova; naupan laia Sunday sikul kaikim lawmawm la ve thin erawh ka ni. Tunlai sakawlh hlauh avanga India ram chhiarpuia inziaklut ngam lo an tam hle niin a lang. Bible hian sakawlh chungchang chu a sawi ngei mai a; a rawn kawlh viau dawn nge, min rawn hap bawrh bawrh dawn nge tih pawh kan hre lem lo. Ringtute tan sakawlh hi hlauh turawm pawh a ni lova; ringtute seh tura lo kal turin Pathian hian a ruahman lo bawk ang. Amah ringtute tan chuan kan Lal Isua pawh hmun siamin a kal mek a; Amah ringlotute chu, he sakawlh kan hlauh em em hian seh hmasakawm tak a ni. Chuti a nih chuan, keini mi maktaduai khat pawh tling lo, Kristian tha inti, kar khata vawi 4 tal inkhawm, rilru thianghlim bawk site hi chu sakawlh seh hmasakah hian kan tang lo hrim hrim ang.

Kar hnih kalta vel khan kan inah chhiarpui chungchanga mawhphurtu, Kulikawn middle sikul zirtirtu chu a lo kal a. Zing thawhphan lai a ni lehnghal. Chumi tum chuan kan chhungkaw member leh pianni leh thlate min zawt a; helaiah hian i hming ziak rawh min tia ka ziak ta mai a. Sakawlh hi kan hlauh em avangin an chhiarpui lehkha pawh chu nguntakin ka bih chiang a hming chu ka ziah hnan ta a ni. Sakawlh number chhinchhiahna a lo nih hlauh chuan keini chhungkua chu kan va han vanduai rua em! Kan landline leh mobile number-te ka la pe zui a nia!.

Ka sakawlh hriat ve chu 1989 kuma kan sanghal kah hliam kha a ni. Kha sakawlh zet kha chu silai tha tawk nen pawh pawngpaw hmachhawn ngam a ni lo. Kan uifing hruai pawh khan a kawlh a ni tih hrechiang ni maw, thui a chhui fal ngam bik lo. A hmul a kawlh ni lovin amah kha hliam tuar a nih avangin a kalwh a; Mizo upaten a hnua rulchuk an tih ang hian a awm a. Silai tha pawh keng ila mahni inrintawk a har kher mai.

Tunlaia 666 kan hlauh em em hi ringtute(Kristian) ni loten lo hlau em em se; Kristianah rawn inpek phah hial se a lawmawmawm mang e. Nimahsela, ringtu inten heti tak maia kan hlau erawh hi chu kan rinna a chak lo a nih lo vek chuan kan rin Pathian kan hre chiang lo emaw, zirtirna dik lo kan dawn a ni emaw, kan mawl vang a ni thei ang.

Chanchinbu leh Tv-a kan chhiar leh hmuh thin angin khawvel hi mi sualte avangin a ralti tulh tulh a. India ram pawh hi a hum lo tulh tulh a ni. Ram pawn atanga min beitute leh ram chhunga pawi sawi lo chunga thihna hial thlen duh pawl hrang tamtak an pung tual tual a ni. Chutih rual chuan India ram sawrkar chuan mahni khua leh tui diktakte chhinchiah hi a duhin, a ti mek a ni. Hei hi passport te, ration card te leh thil dang, sawrkar atanga kan mamawh tur tawk ruahmanna atan a pawimawh a. Entirnan; Liana te chhungkua hian karkhatah buhfai quintal khat ei zo ta ang se la; Nghaki te chhung chuan thla khat an tla thei. Chutiang tak chuan India sawrkar hian kan chhungkaw member tam dan a zirin ration pawh min rawn pe a ni. Kan khulh duh leh duh loh chu chhungkaw dinhmun a ni a; ration mamawh dan pawh chhungtinah a inchen hek lo. Chutiang bawk chuan ram pawn leh ram chhungah chhiat leh that tawh chang ni a awm thin. Heng hunahte hian mi leh sa inhriat hranna atan chiang kuangtaka inchhinchhiah hi a tul a ni.

Hmanni lawkah khan Saudi Arabia atanga India Airlines thlawhna lo thlawk chuan Mengalore airport-ah vanduaina a tawk a; mithite kha DNA hmanga an nihna tihchian a tul hial a ni. Chhungte tan chuan a nghah chhung ringawt pawh kha vanduaina chunga vanduai lehzualna a tling ang tih a rinawm a ni.

A thu hrimah, Mizo Kristiante hian insawithaih kan ching a. Chu chu kan speaker-te pawh hian an ching hle niin ka hria. Kristian chu vanra, leh hremhmun a awm tih kan hre vek a; mahni duh zawk thlan mai tur a ni. Lal Isua pawh khan thil siam zawng zawng hnena chanchintha hril turin min phut a; chutih rual chuan tha duh miah lote an awm ang tih pawh min hrilh bawk. Chuvang chuan sakawlh aia hlauh tur hi vanram kan thlen hma chuan a la pung deuh deuh dawn a ni.

Sakawlh leh khawchhak lungpui lum hlaute hi chu Rev. Chanchinmawia sawi dan takin ‘Veng khaw khat parawn an ni lo hrim hrim’, ‘Lo kal thuai rawh; lo kal thuai la; kan lawm ngei ang’, tia lam durh durh te hi saklawh hlau kan nih chuan Pathian tawk turin kan la inpeh lo hle tihna a ni. Lalpa ringtute chu Zion tlang tihnghin rual loh ni tura Bible-in min zirtir hi tun hun atan a ni dawn lawm ni?

Ram vak mi in ni ve lo mai thei; savawm kawlh leh nghalrul kawlh hmachhawn hi kei atan zawng Pathian min hnaihtirtu a ni. Ka sakawlh tawn tawh zawng zawnga ka hlauh berte an la ni bawk. Chuvang chuan sakawlh hi a hlauhawm, a hmachhawn tur pawhin mihrang nih a ngai.

Thulakna: Mizo Aw