Mara Autonomous District Council huaihawtin November ni 25 khan Kohhran, tlawmngai pawl hrang hrang leh Saiha district MJA aiawh-ten an district chhunga grape wine (Zawlaidi) hralh ve chung-chang an sawiho a. Pawl tam zawk chuan Zawlaidi hi Saiha district-a zawrh loh tha an ti nia thu dawn a ni.
Excise department chuan Saiha district-ah hian Zawlaidi hralh phalna (vendor license) pakhat a pe a. Hemi chungchangah hian thenkhat chuan MADC huam chhunga excise lamin Zawlaidi zawrh phalna an pek chu dan lo a ni, an ti bawk.
Hetih lai hian Champhai-ah chuan kohhran hrang hrang leh MHIP, YMA leh MJA aiawhte chuan Champhai-a Cable Network (CCN) buatsaih ‘Zawlaidi’ chungchang sawihona (talk show) neiin, sawitu tamtak chuan Zawlaidi chu hman thiam tum chi, kut hnathawktute hlawhtlinna siamtu leh ngaimawh lutuk loh chi niin an ngai.
Zawlaidi chungchang sawihonaah hian Kohhran leh pawl hrang hrang aiawhte chuan sorkarin kut hnathawktute hamthatna tura a ruahman, tuna hlawhtling chho mek tha an ti a. Champhai district-a sum leng vak titamtu tur leh chaw-a hman chi, food item pakhatah an ngai bawk. Hetih rual hian alcohol a awm avangin a tha lo zawnga hman theih a ni, an ti bawk.
Thulakna: The Zozam Times