RKS sum hman dik loh haichhuak
Vairengte Damdawi In a NHRM hnuaia Rogi Kalyan Samiti (RKS) sum hman dan diklo awm nia an hriatte chu MZP Sub-Hqrs Vairengte chuan Inrinni khan a hmunah an enfiah a, RTI Act hmanga an chhuinaah sum hman sual leh eirukna awm niin an hria.
MZP hian Education Rest House, Vairengte-ah khaw chhunga tlawmngai pawl leh chanchinbu mite phungbawmah sawmin NHRM hnuaia RSK, Vairengte CHC-in a enkawl dan chungchang bakah CHC, Vairengte-ah kalin RKS sum hmanga hnathawhte a hmun-ah an enfiah nghal a ni.
RTI Act hmanga documents an lakchhuaha a lan dan chuan IV Grade leh Driver te hlawh atan Rs.35,205 hmanral anga a lan laiin, IV Grade leh Driver an chhawr te hming leh awmna a lang tel lova, hei mai ni lovin expenditure-a lang tam takah sum hmanral leh hnathawh inphu lo tam tak awmin an hre bawk.
MZP Sub-Hqrs Vairengte hian vawiin khan Vairengte CHC-a RKS committee chairman hnenah complaint thehlutin, health minister, chief secretary, Mission Director NRHM Mizoram, Director of H&FW te hnenah complaint copy leh documentary video-te an pe nia hriat a ni.
RKS fund atanga sum hman dan chhuichhuak a, mawhphurtu chungah dan anga ‘action’ la turin thunei-tute an phut tih an sawi.
Thulakna: The Zozam Times
