Police 6 man vangin Police lungawi lo Sorkar chet dan thlir reng an tum

Mizoram Police Subordinate Officer Association (MPSOA) chuan, Lalpiangliana thihna kaihhnawiha an police thawhpuite anticipatory bail an dilna hnawl a, man zui an ni chu lungawithlak loh hlea an hriat thu an sawi.

Nimin chawhnu khan MPSOA hian Aizawl Police Station-ah extended meeting neiin, an thawhpuite man an nih dan hi an sawiho a, Lalpiangliana chu judicial custody-a a awmlaia thi a nih vangin, police custody rinhlelh hi thil kalphung ni thei loin an ngai a, thubuai thehluhna (FIR)-ah mimal hminghmerha puh tumah tarlan an awm loh laia an thawhpuiten anticipatory an dilna phalsak an ni lo leh, man zui an ni chu tute emaw nawrna vang mai niah an ngai a, hlauh neih vanga dan kalphung zawm ngam lovah sorkar an ngai tih sawihonaah chuan an sawi lang a ni.

Thu dawn danin MPSOA nimina inhmukhawm hian, an member-pui  sorkarin a man takte chunga thil thleng chu ngun taka enzui ni se an ti a, dan bawhchhiatna a awm phawt chuan ngawi renga thlir  lo a, a theih ang anga dan tlawhchhana chet ve ni se an ti a, bail-a chhuah an nih theih nan theihtawp chhuah a, a tul huna hman atan pawisa pawh thawhkhawm ni se an ti.

MPSOA  hruaitute hian nimin khan DGP an hmu nghal a, an thawhpuite chunga thil thlen dana an lungawi loh thu an sawipui a, a tul dan anga sorkar hotu dangte pawh hmuh zel an tuma thu dawn a ni.

Hetihlai hian anticipatory bail diltu zinga Luangmual Out Post O/C VL Ramhluna chu nimin khan a awmna chin hriat a ni lo tih he thubuai chhuitute hnen atanga thu dawn a ni. An bail dilna court-in a hnawl hnuah, July 13 khan bail diltu mi dang parukte chu police kutah an inpe a;  VL Ramhluna erawh chu inpe ve mai lovin, tunah chuan biakpawh theih pawh a ni lo tih police-ten an sawi.

Thulakna: Vanglaini