Pianga thih thuah Police 6 man Tanhril JAC-in bawhzui zel tum

Lalpiangliana, Tanhril thih thua inhnamhnawiha puh, Vaivakawn Police Station-a police pasarih anticipatory bail dilte zinga paruk chu nimin khan police kutah an inpe a, man an ni; nimin vêk khan Court-ah hruai niin, Court chuan darkar 72 chhung police-in an kawl zui a phalsak. Hetih lai hian, Tanhril JAC chuan Piangliana thih chungchangah hmalak zel an tum thu an puang.

Tarlan tawh angin, Lalpiangliana thih thuah hian Vaivakawn PS-a duty police palite chu suspend an lo ni tawh a, chung police palite leh, Vaivakawn PS-a awm tho police dang pathumte chu Court-ah anticiparty bail an dil a, mahse Court chuan July 12, Thawhtanni khan bail an dilna hi a lo hnâwlsak a ni.

Court-in an bail dilna a hnâwl hnu hian anticipatory bail diltu police pasarih zinga parukte chu man an ni a; police-te'n darkar 72 chhung kawl zui an dil angin, Judicial Magistrate, Sylvie Z Ralte chuan a lo phalsak a ni.

Lalpiangliana thihna chungchangah hian Vaivakawn PS-ah case no. 150/10 dated 1/7/2010 ziah luh a ni a; mahse he thubuai hi July 2 khan CID (Crime)-ah hlan a ni a, CID (Crime) hnuaiah hian Inspector leh Sub-Inspector pahnih ve ve leh, supporting staff pali dangte'n an buaipui zui mek a ni.

Tanhril Jont Action Committee (JAC) chuan thuchhuah siamin, an V/C member, Lalpiangliana thihna chungchangah dikna hlenchhuah a nih hma chuan hmalak zel an tum tih an tarlang.

Tanhril JAC chuan, Lalpiangliana thihnaah thu dik tak rang taka chhui chhuah an phut thu an sawi a, "A huang a zîm êm avangin kan police officer fel tak takte tan thil harsa tur awmin kan hre lo," an ti a; pawi khawih ve lo zingah rilru hrehawm taka awm an awm a nih chuan, fihlîm thuai se an duh thu an sawi.

Home Minister-in dawhthei taka hma a laksak thu tarlangin, Tanhril JAC chuan, a chungah an lawmthu an sawi a; police-te anticipatory bail dilna hnâwl a nih avang leh, an hmalaknaa theihtawp chhuaha thláwptute zawng zawng chungah lawmthu an sawi bawk.

Thulakna: Vanglaini