Pawan Kumar-a'n Mizoram sorkar a khing

PHE Engineer-in-Chief, Pawan Kumar chu sorkarin Consultant-a awm tura a tih leh, ni 30 chhung chawlh la tura a tih chungchangah lungawi loin, Gauhati High Court Aizawl Bench-ah Mizoram sorkar a khing.

Pawan Kumar hi April 22 khan PHE CE, R Lalfanliana hnenah E-in-C charge hlan tura tih a ni a, mahse Court-ah a zualko avangin Court chuan April 26 thleng a tihkhawtlai (stay) a ni. April 26 khan hemi chungchang hi Court chuan a ngaihtuah a, Pawan Kumar-a'n sorkar a hêkna chhânna (Counter Petition), May 6-a Court hearing leh huna thehlut turin sorkar a hriattir a; charge inhlan chungchang pawh Court hearing leh hma chu stay a ni.

Pawan Kumar-a'n Court-a Mizoram sorkar a hêknaah chuan, amah hi India khua leh tui, Jain sakhua vuantu, Aizawla awm nghet a nih avanga Indian Constitution leh Mizoram dan awm angte chu a chanvo a nih vek thu a tarlang a; a tih dik lo awm si loa ni 30 chhung chawlh la tura hriattir a nih ngawt thu te, E-in-C chu PHE Department-a post sang ber, PHE Cadre hnuaia mi a nih thu te, Consultant chu SAD hnuaia post, PHE cadre hnuaia awm lo a nih thute a tarlang.

Hei bakah hian, sorkar khat hnuaia transfer an tum dan chu inhremna thil baka hman a nih ngai loh thu te; Pawan Kumar chu chhui a ni lo a, thiam lohna a neih pawh finfiahna a awm loh thute leh, E-in-C atanga Consultant-a Civil Secretariat-a sawn chu MES Rules, 2001 kalh a nih thute a tarlang bawk.

Ni 30 chhung leave la tura Pawan Kumar hriattir a ni leh, Consultant-a sawn a nih chhana a mawhphurtu chu insawifiahtir turin a ukilte chuan Court an ngen a; Pawan Kumar-a'n E-in-C hna a chelh theih lohna chhan tur a awm loh thu an sawi.

Pawan Kumar hian Chief Secretary, Principal Secretary (PHE), DP&AR (CSW) Secretary leh PHE CE, Lalfanliana te a khing a ni.
Sept30, 2009 khan PHE department-a Workcharge leh MR-te chuan hlawh an lâk theih loh chungchangah Pawan Kumar hi mawhphurtua puhin, a office kái tur an lo dang tawh bawk.

Thulakna: Vanglaini