Orissa for Christ-in An Budget Khum,Rs. 50,77,746 Tling Tawh
Orissa state-a kristian tihduhdah tuarte tanpui tura ding Orissa for Christ Committee, Aizawl chuan January ni 22, 2010-a an pawl din hnu-ah budget atan cheng nuai 5 vel an beisei laiin cheng nuai 50 chuang an hmu tawh tih an sawi a. Hei hi Pathian hnathawh leh malsawmna rah liau liau a ni tiin, chhawmdawlna leh tanpuina thawh mekah chenna In nei lote tan In 100 sak tlin theih an inbeisei thu an sawi.
OFCC hian nimin khan vice chairman, R Vanlalzauva hovin Orissa rama kristian tihduhdahte tana rawngbawlna report an pe a. Upa Lalhluna, secretary report dan chuan sum hmuh tawh zawng zawng belhkhawm chu Rs.50,77,746/- a ni a, Rs.37,47,210/- hmang tawhin Rs.13,30,536/- a la awm. Hmalak zel dan tur leh hmachhawp (project) engemawzat duan a ni tawh a, chung zingah chuan Kandhamal district-ah mumal leh ngelnghet zawka rawngbawlna inbun dan ngaihtuah te, hriselna lama tan lakpuite a tel.
Orissa-ah hian Mizoram atangin mistiri C Lalkhuma hovin mi 5 vel tum thum an fehchhuak tawh a, Biak In 6 leh chenna In 80 sa tawhin, eitur tlakchham zual laiin a harsa zual hnenah buhfai Kg.25-50 thlengin sem an ni a, fahrah naupang 10 te lehkha zirtir paha chawm mek an niin, naupang pakhat tan Rs.1,000/- tumsak an nih bakah, Chanchin Tha hriltu mi 13 chawm mek an ni a, khawvawh zualna hmun Daringbadi khuaah chhungkaw 300 tan kawmawl (Rs.200/- man) pakhat theuh leh Sari 50 sem a ni tawh bawk.
Nimin khan OFCC chairman, PC Biaksiama leh member F Dengbuaia te chu mistiri te In sak enpui tur leh hmalak zel dan tur thlithlai turin Orissa an pan leh a. Nakkum february thla-ah tihdam rawngbawlna nei leh turin vice chairman R Vanlalzauva leh a thiannu B Lalremtluangi-te chu an inbuatsaih mek tih an sawi.
OFCC hmalakna piah lamah hian he state-a kohhran leh mission pawl hrang hrang 21 intelkhawm chuan November ni 25 & 26 hian Rev. LR Colney leh Lalremsiamite kaihhruaiin helicopter hmangin ‘Air Crusade’ leh ‘Ground Crusade’ neih a ni dawn a ni.
B Lalremtluangi te hian tunhnai chho khan Bangladesh leh Myanmar-ah taksa leh thlaurau lam tihdam rawngbawl hna thawka an fehchhuahna report an pe bawk a. Heng rawng an bawlna hmunah te hian mi tam takin Pathian tihdamna changin, khawvel thilah pawh heng hmunah te hian ruihhlo leh zu in hmun a chan meuh loh thu leh entawntlak an nih thu an sawi.
Bangladesh rama rawngbawlna report-ah chuan buddhist puithiam te, MP te, minister te, sorkar hotu dang thenkhat leh anmahni thubuai siamsakna tura tirhte thlenga Pathianin a hnehsak thu te B Lalremtluangi chuan a sawi.
Bangladesh rawngbawlnaah hian an vaiin mi 534 in taksa damna an chang a, chungte chu - mitdel 159, bengngawng 189, tawngthei lo 25, zeng 77, taksa bawk 25, sinus 31, til puk 9, sazu tawi 11, mi a 7 leh mawngping 1 an ni.
------------------
OFCC sum dinhmun report
Mizoram atangin - Rs.47,37,262/-
Tripura atangin - Rs.62,000/-
Myanmar atangin - Rs.2,23,150/-
Bangladesh atnagin - Rs.55,334/-
TOTAL - Rs.50,77,746/-
Hmanral tawh zat - Rs.37,47,210/-
Hman bang - Rs.13,30,536/-
Thulakna: The Zozam Times
