NSF in Manipur kawng dan titawp

Sorkar laipuiin Manipur  kawngpui dan mek titawp tura sipai a tirh a nih tur thu a sawi hnuin, Naga Student Federation (NSF) chuan Thawhtanni zan atang khan kawngpui an dan chu an titawp.

Thla hnih chuang Manipur kawngpui pahnih dangtu,  All Naga Students' Association (ANSAM) leh United Naga Council (UNC)-te chu an thil phut tihhlawhtlin tura lungawilohna an lantirnaah an thlawp zel dawn tih NSF chuan a sawi. Manipur sorkarin an thil phutte a tihhlawhtlin loh chuan nawrh chu an chhunzawm leh dawn tih an thuchhuahah an tarlang nghal bawk.

Thawhtanni khan Home Ministry chuan Manipur kawngpui dan mek titawp tur hian paramilitary force company 16 tirh a rel a, hei bakah hian Nagaland-ah central force company 6 a tir bawk.

Naga Students Federation chuan Thawhtanni vek khan Prime Minister Manmohan Singh hmuin memorandum an thehlut. NSF adviser, Achumbemo Kikon chuan, 'PM chuan dawhthei takin kan thusawite a lo ngaithla a, kan harsatna chu a rang thei ang bera chinfel sak min lo tiam a ni. Inbiakna tha tak a awm theihna atan boruak muanawm siam turin min lo ngen a ni' a ti. PM an kawm hnu hian NSF hian kawngpui an dan hi tihtawp lailawk a nih thu an sawi ta a ni.

State pahnihte inkara harsatna thleng mek chinfel dan ngaihtuahin, Home Secretary GK Pillai chuan Nagaland leh Manipur chief secretary-te chu vawiin hian a kawm dawn a, Union Home Minister P Chidambaram pawhin state pahnih chief minister-te hi a lo be tawh bawk a ni.

Thulakna: Vanglaini