Nikum Aiin Sualna A Pung - Police Thawhrim Vanga Pung A Ni
Nikum tir thla thum leh kumin tir thla thum chhunga Mizorama thil sual tih khaikhinnaah nikum aiin kumin thla thum chhungin sual 49.42 %-in a pung. Nikum 2009 January-March chhung khan IPC thubuai 477 leh Non IPC thubuai 41, a vaiin 518 ziahluh a ni a, kumin January-March thla chhungin thubuai IPC 598, Non IPC 176 a vaiin 774 ziahluh a ni. Nikum aia kumina sual punnna 256 hi IPC 121 leh Non IPC 135 a ni.
Hengte hi nimina Pu L.Hrangnawna, IPS, DIG, Northern Range hoa Mizoram puma Crime Review Meeting neihnaah sawi chhuah a ni a, Police Hqrs. Arya Mess-a he Crime Review Meeting-ah hian Mizoram district pariat atangin SP te, CO.-te, Unit hrang hrang SP te an tel.
Thubuai ziahluhah hian nikum leh kumin thla 3 chhung hian Aizawl district a sang ber am nikumah 275 a ni a, kuminah 465 a ni. Aizawl district-ah ringawt nikum aia a punna thubuai ziahluh 190 a ni a, 69.09%-in a pung a ni. Thubuai ziahluh tlemna ber Mamit district a ni a, nikumah 14, kuminah 18 a ni.
District danga case ziah luh dinhmun chu Lunglei nikum 24, kumin 68, Saiha 31, 29, Lawngtlai 38, 33, Serchhip 22, 23, Vhamphai 56, 78, Kolasib 58, 60 an ni.
Hetia crime a pung hi Police Officer-te chuan mihring pung angin crime pawh a pung ve zel a ni an ti a. Police-te thawhrimna avanga thubuai register leh prosecute (chhui) tam a nih vanga pung a ni an ti. Section 188 IPC hnuaiah ram hal leh tikang thubuai siamsak te, lui tura hrai thubuai te, leivung, ek leh bawlhhlawh a paih lohna tura paih thubuai siamsak te leh kawngkama lung lak thubuai te siam a tam avanga IPC thubuai hi pung nia hriat a ni.
Non IPC thubuai-ah zu thubuai (MLTP Act), IPP Rule thubuai, ND&PS Act (ruih theih) thubuai, Foreigner thubuai leh damdawi hmansual thubuai (Assam Drugs Control Act vanga man tam chuan thubuai ziahluh hi a tisang bawk a ni an ti. Hengahte hian police thawhrimna avangin ruihhlo zuar, zurui, zu zuar hnam dang phalna nei loa lo lutte tamtak prosecute an nih vang a ni an ti.
Pu Hrangnawna chuan District SP te, Commandant te, Unit SP-te chu thawhhona thatak an neih chhoh zel avangin misual zawn chhuah (crime detection) leh dan leh thupek kenkawh chungchanga hlawhtlinna mipuiin an hmu chho zel tiin lawmthu a hrilh a. Chutih laiin mi awm tha duh lo tlem te avangin Mizoram police pumpui hming a chhe thei a ni tiin discipline tha leh crime lo pung zel tur venna kawngah tan laleh zual turin a fuih a, inkhawm hi boruak zangkhai tak leh tluangtaka neih a ni.
Thulakna: Mizo Aw
