NEHU-ah buaina chhuak Mizo zirlai sawisak rawn

25/05/2010 17:00

May 21 leh 22 khan NEHU, Shillong-a MA (Eco) II Semester zirlai, Zoremmuana leh a roommate-te pahnih, PG Boys Hostel No. 14-a mite chu Khasi hoin an sawisak rawn a, hliam a tuar nual. Hei vang hian NEHU campus-a Khasi leh Mizote inkarah boruak a tang hle a, buaina lian zawk erawh chu a chhuak lo nia thu dawn a ni.

NEHU-a Mizo zirlaite hnen atanga thu dawn danin, Zoremmuana hi May 21 zan dar 12 velah an hostel-a Khasi pakhatin a bike hmansak a dil a, ani chuan a tlai tawh vang leh petrol tam loh avangin a tûka hmang zawk turin a hrilh. An inbiak lai chuan bike hman diltu zu inpuite pathum (Khasi vek) chu room-ah lut vein, Zoremmuana'n bike hman a phal lo chu hrethiam loin, Khasi tawng leh English-in bawlhhlawh tak takin an àn khum a ni.

Bike diltu-in Zoremmuana chu a thian a nih thu leh, engtin mah ti lo tura a hrilh pawhin, Khasi pathumte chuan Zoremmuana bakah, a roommate pahnih, Mizo ve vete pawh an hmer tel zel a; Khasi pakhat chuan K Lalrindika thu lai chu a hnek a, an buai tan ta a ni.

An thawm hre phak room danga Mizo leh Khasi zirlaite chu an tlân khawm nghal a, a hnu rei lote-ah Hostel Warden leh Security lam hotute an thleng ve nghal bawk. Buaina chhuah lai hian security guard (Khasi) an awm reng a, mahse engmah an ti lo niin an sawi.

Buaina a reh tawh hnuah pawh Khasi lamin Mizote hi an vau zui a, boruak sosang thei hlauhthawn avangin Mizo research scholar-te chuan security officer leh warden hnenah chuan security mi tam zawk dah turin an ngen bawk.

Buaina chhuah tûk, May 22-ah Khasi ho chu hostel danga mite nen inpunkhawm lehin, Khasi 30 velin Zoremmuana chu zingah an room kawtah an lo châng a, zing dar 7 vela an tho chu an beih rawn leh ta a ni. Hetih lai hian, Zoremmuana roommate Lianngenga chu a la muhil a, mahse ani muhil pawh an bei zui ve nghal a, hmanrua an hmuh remchan ang angin Khasi-ho chuan an bei a ni.

An thawm hria Mizo zirlai dangte an inrawlh hnuah an thelh thei ta a ni. Hetianga an buai lai hian security an dah belhho pawh an awm reng a, mahse engmah an ti lo niin NEHU campus-a Mizo zirlaite chuan Vanglaini an hrilh.

Zoremmuana hi Nazaret Hospital-ah admit nghal a ni. May 23, Pathianni zan khan NEHU campus-a Mizo zawng zawngte chu an inhmuhkhawm a, mipaho chu hmanrua kawl vek tur leh, eng pawh thleng thei tura inrálring turin an inchah a ni.

NEHU-ah hian Khasi leh Assamese zirlaite inkarah pawh tun hnaiah buaina a lo chhuak tawh a, chumi tum chuan Assam Home Minister-in ngaihvenin, a tul angin hma a la nghe nghe. NEHU-a Mizo zirlaite hian an chung thil thleng hi Mizoram sorkar hotute pawhin hriatpuiin, a tul angin hma la se an duh thu Vanglaini an hrilh.