MZU thawktu thenkhat rálmuang lo? Mizoram chhuahsan theihna an zawng
Mizoram University-a thawktu zinga hnam dang thenkhat chuan Mizorama awm a rálmuang loin an hria a, state dangah insawnchhuah dan zawng eng emaw zat an awm nia thudawn a ni.
Tun hnaia Mizo Students' Union-in MZU-a zirtirtu lak chungchangah, Mizote tana luh theihna tura nawrin, MZU Vice Chancellor, Prof. AN Rai chu Mizoram chhuahsan turin an lo ti tawh a; Mizo pa ngei, Registrar Benjamina pawh a hna chawlhsan turin an lo ti tawh bawk. Hetianga zirlaite'n University thuneitu sang laka hma an lak avang hian, MZU-a thawk leh zirtir hnaa mithiam eng emaw zat chuan Mizoram chhuahsan theihna an zawng mek a ni.
Thudawnna chuan, zirtirtu tha tak tak mi 20 chuangin hetiang boruak kara awm ai chuan, state danga kal theihna chance zawngin transfer leh state danga thawh an dil a, University-ah pawh an dilna hi an thehlut niin a sawi.
Hetih lai hian, MZU-a lo zir chhuak tawhte, Ex-Students’ Association of Mizoram University (ESAM) chuan thuchhuah siamin, zirtirtu tha an neih theih nana MZU hotute’n ruahmanna an siam an rin tâwk thu an puang.
ESAM chuan, "Vice Chancellor leh Registrar-te MZU-a an awm chhunga hmasawnna zo zai hi hmuh hmaih chi niin kan hre lo a, an hnathawh ropui tak tak avangin fak an phu em em a ni. Hetiang mi huaisen leh principle mumal nei, páwn lam pressure pawh dâwl zo ngei VC leh Registrar kan nei hi a vanneihthlak kan ti hle.
"Kan VC leh Registrar-te báng tur leh Mizoram chhuahsan tura zirlai pawl thenkhatte’n an nawr chiam hi ngun taka ngaihtuahin, bàntirna chhan tur leh hnawhchhuahna chhan tur a awm kan hre lo a. A bikin, VC hian Mizoramah him tawk lo nia inhriain, a duh chuan Mizoram pâwn atangin MZU hi a awp thei a, administration leh zirnain a tuar viau dawn a ni. Hetianga a tira an demand piah lama mimal taka inbeih zui chiam hian University hmasawnna a thlen lo mai ni loin, MZU hmasawnna a tituanfûm zawk a ni. MSU-in VC laka meizuk chungchang leh tribal hmuhsit nia an puhna FIR an thehluh pawh hi hnûkdâwk leh se kan ti a, heti zawnga hnam feeling chawh thawh an tum hi a âwm lo kan ti," an ti bawk.
Thulakna: Vanglaini
