May 21 zan leh May 22 zinga North Eastern Hill University (NEHU)-a Mizo zirlai pathum, an hostel-a Khasi hoin an sawisak rawn chungchang ngaihven tur leh, buaina a chhuah zui zel loh nana a tul anga Khasi Students' Union (KSU) hruaitute leh thuneitute dàwr turin MZP hruai pathumte chuan nimin khan Shillong an pan.
Mizo zirlaite sawisak rawn chungchangah hian NEHU campus-a Mizo zirlaite leh KSU hruaitute chu an inbe tawh a, boruak pawh a tha tawh viau nia thu dawn a ni. Hetih lai hian, MZP chuan, boruak awmdan a hmuna enfiah tur leh, tun hnu zelah pawh Mizo leh Khasi zirlaite inkarah inhriatthiamna leh inlungrualna tha zawk a awm theih nan, a tul angte be turin Shillong hi an pan a ni.
MZP Vice President, S Lalrinawma hnen atanga thu dawn danin, MZP hruaitu Shillong-a kalte hi an President VL Krosshnehzova; General Secretary, Lalremsiama leh North East Students OrganisationVice Chairman, Lalmuanpuia Punte te an na. Vawiin lam hian KSU hruaitute leh biak tur tul dangte an bia ang a, a rem chuan NEHU hotute leh Meghalaya sorkar hotute pawh biak an tum.
MZP hruaitute hian Shillong an tlawh tur thu hi KSU hruaitute pawh an hrilh lâwk tawh a, nakin zelah Khasi leh Mizo zirlaite inkara inhriatthiam tawnna leh inremna a awm zel theih nana a tul anga hma la tura kal an ni tih an hrilh a ni.
MZP hian Shillong-a kal an tum thu leh an thil tih turte hi Mizoram sorkar hotute pawh an hrilh a. Home Minister R Lalzirliana chuan nimina Student Self-Support Union (SSU) jubilee an hmanpuinaah, MZP hruaitute Shillong kalna senso chu sorkarin a tumsak dawn thu a sawi a, hnam hrang zirlaite inkarah inremna awm se a duh thu sawiin, NEHU campus-a Mizo zirlai pathumte chunga thil thleng chungchang chu ngaihven tura ngenna a dawn nasat thu leh, hemi chungchang hi an ngaihtuah reng thu a sawi bawk.
Tarlan tawh angin, May 21 zan leh May 22 zinga Khasi hoin NEHU-a Mizo zirlai pathum - Zoremmuana, K Lalrindika leh Lianngenga-te chu sawisak rawn an ni a, Zoremmuana chu Nazareth Hospital-ah enkawl a ni.
Thulakna: Vanglaini