MZP-in Memorandum Umzui Zel Dawn
MZP Gen.Hqrs. chuan tunhnaia Mizoram tlawha lo zin Union Home Minister hnena memorandum an thehluh chu a tak ram a thlen ngei theih nan theihtawp an chhuah zel dawn tih an sawi a. Central sorkar chu Mizote aia Tuikukte ngaihsak zawkah an puh.
Memorandum-ah hian Calcutta leh Delhi khawpuia Mizo zirlaite tan Hostel ruahmansak tur te, North East zirlai a bikin Mizo zirlaite himna ngaihtuah tur leh Tuikuk, anmahni duh thu ngeia Mizoram chhuahsantute thlavang chauh hauh lo a, Tuikuk ngeiin an umchhuah Sakhan tlangdunga Mizo leh Assam atanga helin an umchhuah Hmar unaute thlavang ngaihtuah tura ngenna an lo thlen tawh a ni.
Union Home Minister chu Mizoram tlawh inti ve si, Mizo mipui hmuhna hun tlemte pawh buatsaih loa chanchinbumite takngial pawh a hmuh hman loh laia, Tuikukte tana hun a siamsak lawi si chu an hrethiam lo tih sawiin, “Central sorkarin hnam hnufual a ngaimawh dan chu thliar bik neiah MZP chuan a ngai lo thei lova, Mizote Home Minister ni lovin, Tuikukte Home Minister chauh em ni a nih tih hi MZP zawhna a ni,” an ti.
Thulakna: The Zozam Times
