Mizoramah nitin mi 4-in HIV/AIDS vei thar

Indian Network of Positive People (INP+) hruaitute leh Positive Network of Mizoram-te chuan nimin khan Aizawl Press Club-ah thuthar lakhawmtute kâwmin, India ram pum leh, Mizoram bikah pawh nasa lehzuala HIV/AIDS do turin mipuite an ngen. Mizoramah nitin HIV/AIDS vei mi pali hmuhchhuah thar zel ang a nih thu an sawi.

HIV/AIDS do nasat a tulzia puang tura Mizorama INP+ hruaitu lo kalte hi an President, Jahnabi (Assam) leh an hruaitu dang - Brijesh (Rajasthan) leh Puja Thakur (Chandigarh)-te an ni a; Jahnabi hi kum 16 chhung HIV hrik pai tawh niin, Brijesh hi kum 20 chhung HIV hrik pai tawh a ni thung a, an pahnih hian an la chak tha hle ve ve a ni.

INP+ hruaitute sawi danin, India ram pumah HIV/AIDS vei member nuai thum chuang an nei. INP President chuan, India ramah Manipur, Nagaland, Maharashtra, Karnataka leh Andhra Pradesh-te chu HIV/AIDS vei tamna state (high prevalence) an nih thu a sawi a; Mizoram chu 'high prevalence' dinhmun la thleng lo mah se, thleng thuai tura ngaih theih chin 'high vulnerable' a nih thu a sawi bawk.
PNM President, Vanlalmuana leh Secretary, K Lalhmangaiha te chuan, Mizorama district zingah Champhai leh Kolasib district-te chu 'high prevalence' dinhmuna ding an nih thu leh, category an thenah Champhai district chu Category-A niin, Kolasib district chu Category-B a nih thu an sawi a; Mizoramah hian tun dinhmunah, nitin HIV/AIDS vei mi pali hmuhchhuah thar zel ang a nih thu sawiin, tun ang zela a kal chuan, Mizoram chu 'high prevalence state' a nih thuai dawn thu an sawi a ni.

PNM hruaitute chuan, state danga HIV/AIDS veite chu kum tam tak chhung an dam laiin, Mizorama mite chu kum 10 aia rei an dam meuh loh thu sawiin, hei hi Mizoramah Anti-Retroviral Therapy (ART) Centre a awm har deuh vang nia an rin thu an sawi a; kum 2007-a Aizawl Civil Hospital-a ART Centre a awm hnuah chuan, HIV/AIDS vei zinga ART late chu an chak that bik thu an sawi bawk.

Hetih lai hian, ART Centre atanga thudawn danin, Mizorama HIV/AIDS veite zingah, ART la tawh zawng zawng hi, thi tawhte nen vek mi 1,008 an tling tawh a, kumin March thla tawp thlenga HIV+ve hmuh tawh mi 4,381 atanga chhût chuan an la tawk lo niin thawktute chuan an sawi. |ha tak leh a hun taka ART la thin hi HIV/AIDS vei, tuna la damte zingah mi 780 vel an awm a ni.

PNM hruaitute chuan, HIV/AIDS hi Mizoramah a darh chak em avangin, mi tin tan tlan a ngai tih an sawi a, "Kohhrante hi an la îp mah mah a ni," tiin, nasa zawka tan la turin kohhran hrang hrangte an ngen a ni.

Thulakna: Vanglaini