Mizoram chungah Manipuri-te an lawm
All Mizoram Manipuri Association (AMMA) chuan thuchhuah siamin, tunlaia Manipur state chhunga harsatna nasa tak an tawh laia Mizoram mipuite'n an tanpui avangin lawmthu an sawi tih an tarlang.
AMMA thuchhuah chuan, thla khat chuang Manipur-in châk a lâk luhna kawngpui ber pahnih - NH no. 39 leh 53-te dan chah a nih avangin Manipur-in harsatna namen lo tâwkin, nitin mamawh hrang hrang - damdawi, ei tur leh gas leh oil-ahte harsatna lian tak an nei mek tih a tarlang a. Heng an harsatnate sukiang tur hian Mizoram sorkar leh NGO hrang hrangte'n an tanpui tih tarlangin, bungraw phur motor chi hrang hrangte pawh tunah chuan Mizoram kaltlangin Manipur-ah lâk luh mek a ni tih a tarlang bawk.
Manipur-in harsatna namen lo a tawh laia Mizoram sorkar leh mipuite'n kawng hrang hranga an tanpuina chu an hriat reng tur thu AMMA chuan an sawi a; tun hma atang tawhin Manipur leh Mizoram mipuite chu unau ang maia inkungkaihna nei tha an nih thu sawiin, “Pathianin Mizoram mipuite malsawm rawh se," an ti a ni.
Thulakna:Vanglaini
