Mizo Writers Association Buatsaih Proficiency Award Sem

Vawiin chhun khan Archive Hall, Babutlang-ah Mizo Writers Association buatsaihin Proficiency Award sem a ni a, he hun hi Art & Culture Minister Pu PC Zoram Sangliana’n hmanpuiin award te hi a dawngtu te hnenah a hlan nghal bawk a ni.

MWA hian kum 2008 atang khan kum tin MBSE hnuaia HSLC leh HSSLC examination bakah Mizoram University hnuaia B.A. Mizo Honours leh M.A. Mizo-a pakhatna ni apiangte hnenah a hlan thin a, award hian tangkafai cheng sang nga leh lawmpuina thuziak (citation) a keng tel a ni.

HSLC-a Mizo subject-a ti tha ber lawmman Ch. Pasena Prize dawngtu chu J.C. Laltharmawia s/o C.Lalduhawma niin St. Lawrence School atangin HSLC a pass a ni a, HSSLC-a Mizo subject-a mark hmu sang ber lawmman Lalmama Prize dawngtu chu Zirsangzeli d/o RB Hnuna, Piler a ni a, a ni hian Class XII Science stream atang he dinhmun hi a thleng a ni.

B.A. Mizo Honours-a pass te zinga mark hmu sang ber lawmman R.Buchhawna Prize chu P.C.Zorinmawia s/o P.C. Lawmkima, College Veng Aizawl niin ani hian Pachhunga University atang B.A.(Mizo Hons.) hi a zo a ni. kumin 2010 M.A Mizo subject result chhuak ta a mark hmu sang ber chu F.Lalsangliana s/o F.Lalthantluanga, Lunglawn a ni a, a ni hian J. Malsawma Prize a dawng a ni.

Vawiina lawmman hrang hranga in a ken tangka fai Rs. 5000/- theuh hi a Prize hming putu fa ten an thawh a ni. Vawiina Proficiency Prize sem rual hian Mizo Writers Association hian kum 2009 chhunga tawng dang atanga Mizo tawnga lehlin lehkhabu tha bera puan tak “NUN KAWNG THA BER” tih letlingtu Vanneihtluanga leh Melvin Vanlalhlimpuia te hnenah Translation Award 2009 a hlan nghal bawk a ni.

 Thulakna: DIPR