Mizo Tawng: Tlawm Makah Vanzema A Thi

Mat lipuia len tang siam tura Vanzema a liluhin, li mawng puk tha zet maiah hian putar hnaihlai lai a zu hmu tlat mai a. Putar chuan, “E...! Nauva, eng nge i rawn tih dawn le. Kan naute awm loh hlan a ni hlauh chu i vannei a ni. Fairel bel chunga pumtek thi kha la la chhuak leh vat tawh,” a lo ti a. Vanzema chuan thi chu a la a, a chhuak leh ta vat a. (Hetah hian sawi dan a inang lova. Thenkhat chuan thi leh hnangtawm ti an awm.Tin, thenkhat chuan engmah hum lova chhuak leh ta ni-a sawi an awm bawk.)

Li pawnah chuan Vanzema’n a thil hmuh a han sawi chuan tuma’n an lo awi sak lo va. “Hnangtawm tal i rawn hum chhuak si lo,” ti leh, sawi dan dangah, “Hnangtawm leh thi i rawn hum chhuah hi i ken sa a ni ang,” tiin. Chutia an awi tak si lo-ah chuan Vanzema chuan thih leh thih tiin luh a tum leh ta a. “Ka zu let leh ang a, mahse damin ka chhuak dawn tawh lo va. Ka kawngah hian in diar kha zawm seiin min hling ula. Ka chet laih hunah min pawt chhuak dawn nia,” a ti a. A tih ang chuan an hling a. A han liluh leh a, a chet laih veleh an hnuk chhuak vat a. Mahse a lu a lo bung hman reng tawh a. A kutah chuan hnangtawm a hum ran a, an ti. Heng atang hian he tawng hi a lo piang a. Hmingchhiat leh thangtlawm aia thih thlang sawi nan an hmang a. “Hmingchhiat leh rinawm loh hlawh ai chuan Vanzema pawhin thih a thlang zawk ”. Tun thlengin Mat luiah chuan Vanzema li a la awm.

Thulakna: Tawng Un Hrilhfiahna by James Dokhuma