Mizo History Association Conference Cum Seminar
Art & Culture Minister Pu P.C. Zoram Sangliana chuan vawiin chawhma khan Archives Hall, Babutlang-ah Mizo History Association (MHA) Annual Conference-cum-Seminar hmanpuiin MHA buatsaih Historical Journal Mizoram, Volume 11-na a tlangzarh. MHA Annual Conference-cum-Seminar hi Prof. Darchhawna, President MHA in a kaihruai a; Dr. Sangkima, Secretary MHA chuan Report a pe a ni.
Pu P.C. Zoram Sangliana chuan MHA chu Mizoram leh hnam tana an inpekna leh an thawhrimna-ah fakin Mizo hnam tan rohlu an ni a ti a. MHA hmalaknaa paper 150 chuang buatsaih a ni tawh leh Mizo hnahthlak lal 50 chuang chanchin zir a ni tawh te, Historical Journal Mizoram-in Registrar of Newspapers for India (RNI) mai bakah International Standard Serial Number (ISSN) registration a lo nei fel thlap chu ropui a ti hle tih sawiin kumtina an paper buatsaihte leh ziaka an thil vawn that te chu thangthar research scholar te tan pawh a hluin a tangkai hle dawn a ni a ti bawk. Ziaka rawngbawlna kawngah huaisen taka kal zel tur leh thu rintlak, pawmtlak leh a ziaktu ngei pawh a lungthluk zanna thu ziak chhuak belh zel turin MHA Conference hmanga kalkhawmte chu a chah a. Minister chuan Art & Culture Department-in Historical Journal Mizoram chu bu 100 a leisak ang a ti bawk.
Pu P.C. Zoram Sangliana chuan tunlai Mizoram dinhmun sawiin Mizo hnam leh nunau chak lo zawkte chhan turin Mipa te pen chhuah a hun ta a ti a. Pawngsual leh hmeichhe laka hlei lenna chi hrang hrangte do turin hmeichhiate kuta dah ngawt lovin Kohhran leh Khawtlang tanrual a ngai tih a sawi bawk.
Mizo History Association hi Sept 23, 1980 khan din a ni a; tunah hian member 130 chuang an awm tawh. 1982 atang khan Historical Journal Mizoram hi an tichhuak tan a, RNI registration an neih hnuah Volume 1 atanga tan tha lehin tunah hian Volume 11-na an chhuah leh tawh a. Tunah phei chuan RNI mai bakah ISSN registration nei tawhin a nambar chu ISSN 0976-0202 a ni. MHA Annual Conference-cum-Seminar hi ni hnih (25th & 26th Nov, 2010) chhung hman a ni ang a, mi hrang hrang buatsaih Mizo hnahthlak lal 16 te chanchin an zir ho ang.
Thulakna: DIPR
