May 15 hmain Tuikuk lak kir tur
Nikum November thla atanga Mizoram khaw pakua vel chhuahsantu Tuikukte chu Ministry of Home chuan May 15 hmaa lakir turin Mizoram sorkar a ngen a, Mizoram sorkar pawh a inbuatsaih mek.
Heng Tuikuk lak let turte hi nikum November 13-a Bungthuam tlangval, Zarzokima kahhlum a nih hnua Mizoram chhuahsantute an ni a, an vai hian chhungkaw 462 vel an ni.
Ministry of Home Affairs-in ngaih pawimawha nei turin Mizoram sorkar a rawn hrilh a, May 15 hmaa an awmna khua theuha awmhmun bengbel leh tura hmala turin min rawn beisei a ni, tiin Home Secretary Lalmalsawma chuan a sawi. An lo kir leh chuan an inbenbelna tur pawisa leh in sakna tur pek an nih bakah leh Mizoram sorkarin ration buhfai a sem thin ang a thlawna pek tur a nih thu a sawi bawk.
Hemi chungchangah hian vawiin hian Home Secretary hoin official thenkhatte'n vawiin hian Mamit an pan dawn a, DC aiawh leh Police lam tenen an sawiho dawn a ni.
Hetihlai hian BNLF leh BLFM lokirte pawh lo kir tura ruahman mek a ni a, tuna Tripura Refugee Camp-a awm mekte lo kir theih nana road map siam chu nikuma Zarzokima kahhlum a nih vangin a la sukuk rih a ni.
Kum 2009 Electoral Roll ang chuan Refugee camp-a awm mekte chu chhungkaw 3460 vel an ni a, Roll-a awm chin chu mi 12,538 leh an fate Roll-a la awm ve lote an ni.
Thulakna: Vanglaini
