Mark Hmuh Zat Ennawn Vek Dawn Pawl Hrang Hrangin Hmuhpui Ang
April ni 22-a neih Mizoram Technical Entrance Examination result April ni 23 zanlai vela tihchhuah chu sawiselna a awm avangin Education Minister Pu Lalsawta chuan exam beituten subject hrang hranga an mark hmuh zat chu remkhawm (tabulate) a, belhchhuak thaleh turin thu a pe a, vawiin atang hian exam beitu zirlai 1544 mark hmuhte chu la chhuakin belhchhuah leh vek a ni ang a, exam beitute result zawng zawng a hma thei ang bera tar chhuah a ni ang.
Nimin chawhnu lam khan Aizawl Press Club-ah Parliamentary Secretary Pu Chawngtinthanga nen press conference neiin Pu Lalsawta chuan technical course zir tur thlanna exam buatsaih result chhuakah sawi neuh neuh a awm avangin an party Congressin a ngaihtuah leh sawrkar taka ngaihtuah pawhin chanchinbumite nena inkawmna neih tha tih a ni tih a sawi hmasa a. Technical Entrance Exam result chhuaka fel hlel awm nia sawi chinfelna tura a rawtnate chu nimin zingah Chief Minister a rawn a, CM pawhin a pawmpui a ni a ti.
Pu Sawta chuan a chepa kai atanga thil awm dan sawiin zirtawpni zan lai vela result tihchhuah chu a tuk April ni 24 inrinni tlai dar 6:00 hma lamah engmah fel hlel a awm tih a hriat loh thu, a hriat veleh chak taka hma lain Pathianni leh thawhtanni nilengin result-a sawiselna neite tan hun hawn a ni a ti a. Pathianniah lut a awm lo a, thawhtanni tlaiah chuan Secretary, Education hnenah complaint 59 hmuh a ni a, "Ka thiam hle si a, ka tling lo" ti 41, "Ka thiam tho nain ka rin aiin mark ka hmu tlem" ti 13, Medical line exam-a engineering line-a tling anga tarlan 9 leh Engineering line exam-a medical linea tling anga tarllan 3 an ni a ti.
Minister chuan heng zingah hian a hnuhnung 9 leh 3, mi 12 complaint-ah hian tih dik loh palh a awm theiin enzuia chinfel ngai nia a hriat thu sawiin hengte mark hmuh remkhawm (tabulation) chu ennawn leh turin Secretary Education chu a hriattir tih a sawi.An chhanna (answer paper) te ennawnleh tur tihna a ni lo tih a sawi chiang.
Zawhna chhangin Pu Lalsawta chuan a nawlpui zingah mi 12-te bik mark hmuh ennawn chu a harsat dawn avangin exam beitute zawng zawng mark hmuh chu ennawn vek a, remkhawm a, chuta tang chuan exam zawng zawngte result chu tihchhuak turin thu a pe a ni a ti.
Hetianga exam beitute mark hmuh ennawn hi Secretary Pi Eesther Lalruatkimi chuan ama thatih leh remhriat danin a kalpui ang a, hmuhpui turin MJA, CYMA, MGIP,MUP,MZP,MSU leh NSUI aiawh pakhat theuh ngen ni se, video thla lo la (cover) turin Zonet leh LPS sawm ni bawk se, Technical Education Interview Board memberte tul an tih leh lo tel ve se tiin Pu Sawta chuan rawtna a siam bawk a ni.
Thulakna: Mizo AW
