Kolasib-ah ZOLENTU Kutpui Hman A Ni Ta
Vawiin khan Kolasib Tumpui field ah ZOLENTU KUTPUI nihnih awh tur,Mizoram sawrkar Art & Culture Deptt. leh NEZCC te buatsaih chu Art & Culture Minister Pu PC Zoram Sanglianan a hawng.
Hawnna thu sawiin Pu Zoram Sangliana chuan Mizo te khawvel hriata min pho langtu chu kan hnam incheina leh lam mawi tak takte hi an ni a. Thangthar te hnena kan hnam thil te rochun tir zel turin heng kan hnam min timawitu kan lam leh hla tehi kan uar deuh deuh tur a ni, a ti a. Kan hnam lam mawi tak Cheraw hmangin khawvel record Mizo ten kan siam tawh a. Khawvel hriatah kan in tar chhuak a,kha kha thil ropui tak a ni tiin Zo nun ze mawi hi I vawng nung zel ang u, a ti a ni.
Zolentu Kutpui hawnna inkhawm hi Pu Ngurbiaka, Jt. Director in a kaihruai a. Minister hmalakna a he kutpui hi tih puitlin a ni,tiin lawmthu a sawi a. Khaw hrang hrang atanga zai leh lam entir tura lo kal te chu lawm -thu a hrilh a ni.
Sub Hqrs YMA,Kolasib chuan Zolentu Kutpui hi a thleng a. Sub hqrs hnuaia YMA Branch 78 te chu Hnam lam leh zai entir tura sawm vek an ni a. YMA branch 35 in Hnam lam an entir dawn a, Branch 39 in Lengkhawm zai an entir dawn a ni.
Vawiina Kutpui hawnna ah hian Kolasib DC Pi Niharika Rai,IAS leh SP Pu Madhur Verma te pawh an tel a ni.
Thulakna: DIPR
