Khawvel Ralthuam Lei Nasa Ber - INDIA

India chu khawvela ralthuam lei nasa ber ram a nih thu, Stockholm International Peace Research Institute (SIPRI) chuan ni 14 March 2011, Thawhtanni khan a tarlang.

Kum 2006-2010 chhunga khawvel ram hrang hrangin ralthuam an lei belhkhawm zat za-a pakua (9%) chu India-a lut a nih thu tarlan a ni. A ram venhimna atana India budget chu U.S. dollar tluklehdingawn 32 ($32.5bn) zet a ni a, India ralthuam za-a sawm sarih (70%) chu ram dang atanga lak luh a ni.

India chuan a ralthuam tihchangkan nan, kum 5 chhungin U.S. dollar tluklehdingawn 50 ($50bn) zet hman a tum a, a ralthuam lei tum zingah chuan $10bn man hu ralbeih thlawhna (jet fighter) thar 126 pawh a tel a ni. Tin, India chuan 2010 October khan, Russia hnen atang kum 10 chhunga ralbeih thlawhna changkang (advanced fifth-generation stealth fighter jets) 250 – 300 lei a tum thu a puang bawk.

Hetianga India-in a ralthuam tihchangkan tuma a bei vak mai hi China ram changkan tual tual vang te, a hmelma kumhlun Pakistan ram ralthuam tihchangkan a nih zel vang te leh khawvel ralthuam neihthat inelna nasa chho zel vangte a ni.

SIPRI-in khawvel ralthuam kalkual vel dan a tarlan danin, kum 2006-2010 chhunga khawvel ralthuam hralhchhuah zawng zawng zinga 43% chu Asia khawmualah, 21 % chu Europe khawmualah, 17% chu Middle East-ah, 12% chu America khawmualah, 7% chu Africa khawmualah a lut a ni. Ralthuam lei tam ber ram 4-te chu India, China, South Korea leh Pakistan te an ni a, khawvel ralthuam hralhchhuah zawng zawng zingah - India-ah 9%, China-ah 6%, South Korea-ah 6%, Pakistan-ah 5% a lut a ni.

U.S.A. chu khawvel ralthuam hralh chhuak tam ber ram a la ni a, kum 2006-2010 chhunga khawvel ralthuam hralhchhuah zawng zawng 30% chu U.S. atanga chhuak a ni.