Khawtlangin Republic Khelmual Sports Council Kutah Hlan

Vawiin khan Sports Minister Pu Zodintluanga pisa ah Republic Veng khawtlang hruaitute  chuan Republic Khelmual(field) chu Mizoram State Sports Council (MSSC) kutah an hlan a, inhlanna thuziak ah hian Republic Veng Village Council hruaitute, Republic Veng YMA hruaitute, Republic Games and Sports Association hruaitute leh Sawrkar aiawhin Pu P. Lianhrima Secretary , Sports  Department leh Pu Lalramzauva Vice President MSSC te chuan hming an ziak a. Hming ziah zawh hnu hian  Pu Vanlalruata VCP Republic Veng chuan Republic Field LSC chu Pu Zodintluanga, President MSSC ni bawk hnenah a hlan nghal a ni. 

Pu Zodintluanga chuan Republic khawtlangin ngaihtuahna zau taka neia, thalai leh an tu leh faten infiamna lama hma an sawn theih nan an veng field Sawrkar kutah an hlan phal chu fakawm leh ropui a tih thu sawiin, field cheithat hunah a chhawr ber tur chu Veng mipui te an nih tur thu a sawi. Minister chuan kar hnih khat velah Field cheithat hna a bikin – field chhuat rual rem lo leh tuihawk luan kawr mumal tak siam chu tan thuai a nih tur thu sawiin khawtlang hruaitute chu hna a that theih nan, hnathawh hunah vil pui turin a chah bawk a ni.

Pu Zodintluanga chuan Mizoram a thalai lekhathiam tam takin hnathawh tur an hmuh loh laia infiammi phai lama thawk chhuak ten eizawnna atana infiamna an hmang chuan infiamna(sports) ah hian chhungkaw chawmna khawp a awm tih a tilang chiang hle a ni a ti bawk.