Khatla khawtlangin Black Day hmang
Khatla High School venga kumtling lo pawngsual vanga NGO hrang hrang ten vai pawn chhuah an khap chu hnam dangten an zawm tha hle. Khatla VC leh NGO hrang hrangte chuan an venga pawngsual thleng an duh lohzia entirnan nimin zing dar 6 atang tlai dar 5 thleng ‘Black day’ an hmang a. Veng chhunga dawr zawng zawng khar a ni a, Khatla kawna taxi dingte pawh ding lo tura an ngen angin an zawm tha hle. Hetih lai hian Hindi zirlaite chuan pawngsual duh loh entirnan kawng an zawh ve bawk.
Black Day hman chhung hian khawtlang hruaitute chu Khatla kawnah nilengin an duty a. Pawngsual thlen zan leh nimin khan an veng chhunga vai permit enfiahin permit nei lova khawsa mi 30 chuang police hnenah an hlan. Permit neite pawh anmahni sponsored an nih dan leh an permit anga hna an thawh leh thawh lohte enfiahnan an permit an laksak bawk.
Vai pawn chhuah khap anih avang hian nimina Govt Aizawl College leh Govt Hrangbana College-a technical entrance exam a tel hnam dang zirlaite leh Mizoram University-a Asstant Proffessor atana interview tur hnam dang kalte chu police ten uluk takin an veng bawk. Aizawl khaw chhunga Biak In satu hnam dang hnathawktu thenkhat chuan hna an thawk a, harsatna tawk erawh an awm hriat a ni lo.
Thulakna: The Zozam Times
