Kawnpui Dai-ah Hritlang Damdawi Lakchhuahna Kawr Ruak Thahnem Tak Chhar A Ni

- Muanpuia

Ni 16 November 2010, Thawhlehni tuk khan Kawnpui khaw dai-ah hritlang Damdawi ‘NAM COLD’ mum lak chhuahna kawr ruak Lehkhakhawng Bawm 42 a dahkhawm hmuh a ni a; Damdawi Mum erawh hmuh tur a tlem hle a; hei hi nizan lama mi tu tih hriat loh in an dah niin a lang. Chhiar vek nilo mahse Bawm khata thun theih zat chhutin mum 200000 (Nuai hnih) a tlin ngei a rinawm a; Hetiang Damdawi lei thinte chuan Mum khat Rs 3/- in an lei thin thu an sawi a ni.

He damdawi bawm ruak hi Kawnpui Hmarveng Br YMA chuan chhar khawm in an dahkhawm a; thil danglam tak ni thei-a a lan avangin Kawnpui Police Station an hriattir a ni. Damdawi te hi Guwahati atangin Oct ni 30 khan Distributor hnena rawn thawn anih thu a bawm atangin a hriat theih a; a thawntu hriat theih mahse a dawngtu address kimchang tak hriatna tur zawng zawng chu tihchhiat vek a ni thung. Damdawi kawr-a a inziak dan chuan Sept leh Oct thla-a company-in an siam a ni tih a lang thei bawk.

 Health Deptt Staff te hnen atanga thudawn chuan Damdawi hlauhawm tak nilo mahse tun laiah Damdawi tha phawrhchhuak-a pawlh dalin Damdawi chhe zawk siam chhawngtu an tam hle a; chutianga siam danglam tur lakchhuahna kawr ni theiin an ring a; tun hnaiah pawh Damdawi thenkhat chu a supplier hnena pek let a awm nual tawh a ni an ti. Hetih lai hian mi thenkhat chuan Hetiang damdawi hi ruih nan an hmang thin a; a kawr nena hralh lovin an pe chhuak thin niin an sawi bawk.