Kangmei vangin ramngaw chereu nasa: Kumin-ah ram hectare 18,976.48 a zau kang chhia

Kumin chhung hian kangmei hmun 1036 ah a chhuak a, kangmeiin ram a kan chhiat zauzawng hi Hectare 18,976.48 zeta zau a ni.
Vawiina Envirtonment & Forest department hnuaia officer ten kumin chhunga kangmeiin ram ngaw a tihchhiat dan an sawihona-ah he thu hi sawi chhuakin, heng kangmei te hi lo hal vangte, electric kal sual vangte-a kang a nih thu tarlan a ni.

Report atanga a lan danin Aizawl Forest Division-ah kangmei chhuak a tam ber a, tum 829 a chhuak. Hetih lai hian Kolasib Forest Division-ah ram kang chhia a zau ber thung a, kumin ram kang avang ringawt khan ram hectare 13467 lai a kang chhia a ni.
Mizoram pumpui hi Forest Division 15-ah then a ni a, heng division zingah hian Kawrthah FD, Dampa Wildlife Sanctuary, Lawngtlai FD leh Tlabung FD-ah te chuan kangmei chhuak a awm lo a ni.

He officers meeting, Principal Chief Conservator of Forest (PCCF) Dr.SS Garbyal kaihhruaiah hian tunhnaia ruah leh thlipuiin forest department bullding leh bungrua a tihchhiat chungchang sawiho a ni bawk a. Meeting-ah hian forest quarter 31, rest house 4, nursery 2, checkgate 3, timber depot 2, DFO complex leh range complex panna kawng hmun hnih, quarter tukverh chhia 183, office chhia 1, water tanky 1, sapeltute channa hmun 6 a chhiat thu tarlan a ni.

Meeting-ah hian kum 2009 - 2010 chhung atana Project pawm tawh zat chu Rs. nuai 139.56 a nih thu tarlan niin, heta tang hian Rs. nuai 119 chu release tawh a nih thu tarlan a ni bawk.

He sawihona inkhawm hi Environment & Forest Minister H.Rohluna’n a hmanpui a ni.

Thulakna: The Zozam Times