Ka Harhchhuak Ta Hlawl Mai A!

- Lalhlimpuii

Pathian hian kei hmeichhe awmnem tak leh mihring zinga rual ban lohna nei tam bik tak hi, min hmangaihna ka nunah kawng tam takin a rawn lantir thin a. Chumi zinga pakhat chu kum 2009 September thla khan Switzerland ram, Geneva khua, Ecumenical Institute of Bossey-ah KRISTIANTE INPUMKHATNA tih thupui mawi tak zir turin min han hruai thleng hlawl mai a. Zirlai mi 36 zingah a naupang ber dawttu ka ni a. Kei aia naupang chu Hangury nula Naom-i a ni a. Ram hrang hranga sakhaw hruaitute, sumdawng mite leh chanchinbu mite kan ni hlawm. Kristiante inpumkhatna atan hian kohhran hruaitute chauh an pawimawh lo va, sum dawng, kuthnathawk mite, chanchinbu mite leh mitin kan pawimawh zia min hriat chhuah tir a ni.

Classroom-a lehkha chhiar, sawihona neih leh paper ziah lam bakah hmun pawimawh tlawha zirna min pek hi kan college tum pakhat a ni a. January 24 atang 31 2010 khan Rome, Italay leh Vatican khawpui-ah kan zin a. Vur tam lai tak a ni a. A vawt hle a ni. Ni 31 zan reh tawh hnuah Rome khawpui a atang kan awmna hmun Geneva chu kan thleng leh ta a, kar khat chhung Rome leh a chhehvel hmun pawimawh tlawhin kan vak hah hle a, kan chau hlawm hle a ni. Taksa chak vak loh laia vur khal nal tawh lam chunga kal chu hahthlak tak a ni. Dimtein ke kan pen chhek chhek a, khawvawt nen hah hi a dam thei mawlh lo a ni. Kan chaw eina building Chetaeu de Bossey- leh zirlaite hostel Petit Bossey chu minutes 10 vel kea kal a ni a. Khua a vawh zual em avangin vur nal tak kara tluk palh hlau thawng tak chungin hmanhmawh takin kan kal hlawk hlawk a.

Chutia taksa chau tak chung chuan kan zirpui Brazil ram atanga rawn kal Roman Catholic tlangval Vladimir-a chuan a tlai chaw ei kham, Petit Bossey lama a room lum a thlakhlelh em avangin cycle(thirsakawr) chak takin a khalh a. Zirlaite chenna hmun Petit Bossey kawt a thlen meuh chuan a cycle khalh khan vur nal tak a control thei tawh lo va, kawng sirah a let ta tawp mai a. A cycle rahna a bung hmawk a, a ke tang leh a wheel vel pawh a kawi nung hlawm mai. Vladimir-a chu eng ti takin nge a insawh tih tumahin kan hmu hman lo. Kan hmuh meuh chuan kawng zirah zangthalin a tlu a, tawng thei lovin a lo meng rang ruai ruai a. A insawhna hle tih a hriat a ni.

Hetia kan thianpa accident a tawh lai tak hian ka roomah ka lo lut fel der tawh a. Ka hre lawk lo a ni. Ka thiante chu hmanhmawh tak hian an lut chhuak chhen a. Ke pen ri ring tak chu ka room atang ka hre thei a. Hmanhmawh tak hian an tlan kual hlawm a ang. Engnge ni ta? Tiin ka room atang ka han dak chhuak chu, a thenin rizai, blanket lum leh lukham...an lo pawm luai luai hlawm a. Romania Orthodox Kohhran atanga kan zirpui Valentine Visa-a chuan, Vladimir cycle nen a chet sual thu hmanhmawh takin min hrilh liam puat a. Kan ram atanga ka zirpui, Saya Van Hmunga'n kal ve duh suh i thla a phang mai mai..min tih pawh ka chhang hman lo, hmanhmawh tawkin pawn lamah ka chhuak ve ta a. Kan thian dangten an lo hual thup a. Vladimir chu a lo rum ngat ngat a. A khat tawkin Please Please Please....(khawngaih takin, khawngaih takin...) tih bak engmah a sawi thei lo. Kan tawngtaisak che.. lungngaisuh..tiin Anglican Kohhran puithiam, Sir Lanka atanga rawn kal Christiea'n a hnem a. A then kan tawngtai mawlh mawlh a.  A then kan tap pur a.

Kan zirna hmun hi France tawng hmanna veng a ni a. Zirlaite zingah Frence tawng thiam pahnih chauh kan nei a. Belgium ram atanga rawn kal, Roman Catholic father Chistophe-a leh Roman Catholic tlangval vek, France ram atanga rawn kal Danis te an ni a. Christophea'n ambulance(dam lo phur motor) a koh va, nghakhlel takin kan thlir a. Motor ri kan hriat apiang a rikna lam tlirin kan ngawi thap a. Motor 10 chuangin min kal pel a, kan thianpa rawn phur tum motor reng reng an awm lo a ni. Vur a sur reng avangin, Iraq ram atanga lo kal Orthodox sister Theodora-i’n mittui parawl pur chungin nihliap a zawn a. Motor kan koh atanga minutes 5 hnu velah chuan kan thianpa rum pawh a zawi tan a, a muhil ti tih a, a lu a thle kawi hniang a. Nakin deuh lawkah kan Professor. Odair-a a lo kal ta a, Vladimir-a chu Portugese tawngin a rawn be ta a, harh turin a be mawlh mawlh  a. ''Vladimir, please dont fall asleep''(mihil lo hram rawh) tiin Syria ram atanga lo kal, Orthodox kohhran Sister Fedia-i tawng ka hre mawlh mawlh bawk a. Tumah kan in be thei lo.

Chutia mangang taka khawvawt tak kara awm reng chu ka tuar thei lo va, ka room lumah ka tlan lut a, ka lungngaih apianga ka biak thin ka thian pakhat hi ka va phone a, lo tawngtai ve turin ka ngen tawp a. Tichuan, pawn lamah ka va chhuak leh a, motor chu a lo la thleng chuang lo. Ambulance (motor) phone a kohtu Father Christophe-a kiangah ka va ding a. A ni chuan zawi sap hian,“Cycle accident ringawtin a thih theih loh, Pathian hnenah kan tawngtai theuh va, Ambulance pawh minutes 15 chhungin an rawn thlen tur thu min hrilh tawh bawk a, engahnge zirlai zawng zawngte hi mithi taha an tah a, an lungngaih ni? Pathian rinna kan va nei tlem hlawm ve!! Rilru ipik tak chunga kan lo awm khan engmah awmzia a awm lo.“ a ti nuah nuah a. Amah kan en kiau va, ka rilru te tein..mimah mangan nak lai, i va ho reuh e!!ka ti ru hial a.

A tawpah thawmri nei miah lovin, kawng a rawn eng pup a, kan han hawi phei chu Ambulance a ni reng mai. Kan lawm lutuk hi kan thaw huai a. Motor pahnih a ni a. Hmeichia pathum leh mipa pahnih an ni. Kan thianpa kan khawihsawn ngam loh kawngsira mu reng chu an han khawihsawn deuh va, a ni lah a na ti lutuk a rawn rum ring zual sauh sauh va. Khawihsawn a ngam lo a ni. A ngaihna kan hre lo hman khawp a. Mahse, a nghawng donaten an han dawm ngil a. A taksa an khuh lum a, thir pek sei mihring chen zet pahnih hi a ding leh veiah zawi muangin an rawl luta, a tawpah an chawikang thei ta a. Nawrlirah an hlang kang ta a. A chetsual dan, a tluk dan an hriat chian hma chu dam dawi ina kal rem an tih loh avang khan, kan han inzawt kual leh rih a. A tawpah a mah an zawt thei ta a. A tluk atang minutes 45 hnuah dam dawi in lam panin, kan thian French tawng thiam Danisa'n a zui ta a.

Zirlai zawng zawng leh kan professor thenkhatte nen, Common roomah Vladimir-a tan tawngtaina kan nei zui nghal a. Tap chungin kan tawngtai hlawm a. Kan zirlai nun tihlimtu ber, kan fiamthu thawhthiam ber a‘n dam lo meuh chu kan thla a phang tak zet a ni. Common room hi zirlaite intihhlimna hmun a ni a, tuna dam lo Vladimira hlim taka a lam dawrh dawrhna hmun  a ni bawk a ni.

Vladimir-a chu dam dawi inah zan hnih a riah hnuin hostel lamah a rawn haw thei ta a. Accident avanga inhliamna sawi tur vak a awm lo va. A nghawng ruh leh a tha vel damdawi hnawiha enkawl chhunzawm a tul emaw chauh a ni a. Chutia dam taka kan awmna Petit Bossey a rawn thlen ni chuan Father Christophe-a vek chuan ka hnenah,“Puii, i hria em? Ka sawi reng kha. Mihring hi a tul lovah kan mangang chiam a, keimahni kan inti hah em em a. Pathian hnena kan tawngtainaah kan innghat pumhlum thei meuh lo a ni. Pathian tanpui i dil tawh chuan, a rawn ti ngei ang tih ringin chiai lo va awm mai tur a ni. Tichuan, Pathian tan tih theih kan nei tam bawk dawn a nia“ min han ti chu ka harhchhuak hlawl mai a.