Isua Mit-ah Ka Piang !!!

Tlai khat chu ka lehkha zirna pindanah an fapa chungchang thu tam tak min zawtin Jason-a nu leh pa an lo leng a. Jason-a chungchang min zawhnate chu ka theih ang angin ka lo chhang a, an nupa-in an lawm hle niin ka hria.

An hawn dawn hnai-ah chuan an fapa Jason-a chu an fa tak tak ni lo, mi fa an lak chawp a nih thu min hrilh a, chu ‘an fa tak tak a nih lohna’ chu ka zirlai naupang Jason-a chu thiam taka hrilh turin min ngen ngawih ngawih. Chuti taka min ngen avang chuan kei pawh chuan ka thiam tawka nem leh thluma hrilh turin ka tiam ta a ni. Hmangaih taka enkawltu tuna a nu leh a pa hi a nu leh a pa tak tak an nih loh thu Jason-a hnenah chuan engtin nge ka hrilh tan dan tur? tih ngaihtuahin zan hnih ngawt ka tlaivar.

A nu leh pa-in min ngen atanga ni thum ni skul banah chuan, Jason-a chu haw nghal mai lova awm fual turin ka ti a. Zirlai naupang dang an haw rem hnu chuan, “Jason, ka thusawi hi ngun takin lo ngaihthla rawh. Hmanah nupa hmangaihna ngah tak, Pathian thu awih tak hi an awm a. Chu mite nupa hnenah chuan daktorin fa an neih theih loh thu – nu pum chhungah nau  a awm theih loh thu a hrilh a, pawi an tiin an lungngai em em a. Chutih lai tak chuan nu pakhat pum chhungah chuan naute a awm a, nimahsela, Van atangin Isua chuan chu nu chu Nu a ni thei lo tih a hmu. Tichuan, nupa nau nei thei lote hnenah chuan naute chu Isua’n a kawltir ta a. Chuti chuan tuna i nu leh pa te nen hian chhungkua in lo ni ta a ni,” tiin thu tak zetin ka hrilh. Jason-a chu ngaihtuah nei niawm takin a ngawi ta vung vung a, thil dang engmah kan sawi chhunzawm lo.

A tuk skulah chuan, “Isua pum chhungah ka awm a, chuta tangin em ni ka lo pian?” tiin uluk takin Jason-a chuan min zawt! Nui deuh titih-in, a nih loh thu ka hrilh a, sawi chhunzawm loh tha nia ka hriat avangin engmah ka sawi chhunzawmpui ta lo. Chumi tlai chuan kum 5 mi Jason-a hnena ka thu hrilh kha ngaihtuah letin a zawhna maksak leh mawlmang tak kha ka rilru-ah a cham reng.

A tuk lehah - chhiarkawp a chawh laiin, Jason-a chuan, “Zirtirtu, zirtirtu,” tiin phur tak maiin min ko a, “tunah ka hrechhuak chiah e. Isua pum chhung atangin ka lo piang lo. Isua mit-ah ka piang a ni, tunah ka hrechhuak chiah – a dik tiraw, zirtirtu? Isua mit atangin ka lo piang,” tiin a thil hriatchhuah thar chu, ring tak maiin min hrilh!