Internet khawvela cheng mihringte hian rual pawl nan hun kan nei tlem deuh deuh a, kan hun awl neih chhun lah internet-ah kan hmang a, thiante nen kan inbia a, kan inkawm a, chanchin kan inhlui tawn a, thian thar kan zawng a, thian kan siam thin. Chumi atan chuan Social Network – Twitter, Facebook...adt. kan hmang nasa deuh deuh a ni.
Ram changkang-a mi hausate khawl mihringte (robots) pawhin computer an hmang thiam tawh a, internet kaltlangin hmun danga anmahni anpuite nen an inbe pawp zung zung ve mek bawk.
Tunlai hian Car changkang tak tak a chhuak thar zel a, a lova kan awm theih tawh loh Car inneih thatsiakin mi tam tak an inel mek. Mi tam takin an Car an hmangaihin an duat em em a, hmun danga an kal hlan pawhin an Car chu an rilru-ah a awm reng thin.
Toyota company chuan, “Tunlai Car chhuak tharah hian computer a tel zel tho tho a, Car-te hian Social Network hmang thei turin siam ila, Facebook account te, Tweeter te nei ve sela, anmahni neitute nen inbia (chat) thei sela, chanchinte inhrilh hre thei sela,” tiin a ngaihtuah mek. Kum tam a liam hmain nang pawh i Car nen in la in-email ang a, Facebook-ah te in la inthian ang a, in la in-Tweet vel ang a, i Car chu internet-a i thian tha tak a la ni mai thei!?