Homosexuality leh Lesbianism Kan Zingah Engnge a Dinhmun?

- J.Khuma

Homosexuality hi khawvel hot issue a ni a. Ram tam takah a khual ta lo hle. A awmzia chu sex inangte nupa anga inkawptlata khawsak hi a ni, kan tithei awm e. Lesbianism hian chuan hmeichhia leh hmeichhia in-nupa hi a sawi a. Homosexuality hi chuan mipa leh mipa in-nupa pawh hmeichhia leh hmeichhia in-nupa pawh a kawk ve ve thung. Chutiang bawkin bestialism hi rannung le mihring inpawlna hi a ni ve daih bawk. Tun tum chu Homosexuality hi i han Zopa tapchhak thubawl dawn teh ang.

Zo khawvel hi a thianghlim ang reng khawp mai a, hetih kawngah hi chuan. Mipa leh mipa hi an innei lova, a hman erawh kan inhmang a ni awm mang chu a tih theih. Mak ve ang reng tak erawh chu hmeichhia leh hmeichhia hi inhmang an awm zen zen emaw phei chu kan hre tam lo nang a, innei an awm nual. Kalay-Kabaw Zokhua heti zat lekah hian hmeichhia leh hmeichhia innei hi tuak sawm dawn an awm awm e.

Mipa leh mipa hian chuan ka leh ekna kua lam an hmang nia hriat a ni a. Hmeichhia leh hmeichhia hian chuan kut leh hmanraw hrang hrang, mombati, bawkbawn, fanghma le toysex te an hmang niin a lang. Engpawh nise heng ho chungah engtia ngaihdan neih tur nge a nih lam kan sawi hmain keini aia lo hmang hmasa hnam changkang dang te-ah a lo chhuah tan dan leh an chunga ro an rel tak dan te i lo thlir hmasa teh ang.

European leh USA hi a lo chhuahna hmasa an nih loh vek pawhin khawvel ngaihdan siamtirtu an nihchawk avangin lo thlir ta ila. Homosexual ho rilrua an mahni thiam an inchanna atana an hman deuh ber chu hei hi a ni. Mipa leh hmeichhia dik tak pawh innei sela fa neih nan an ti chuang lova. An chakna inhriktlakna atan bak an tih chuang loh ahnu keini pawh kan inhriktlaksak tawn a, engnge a sualna tih hi. Ani lak tak a. European leh USA tea nupa tuak 65% leh a ai maha tam hret te chuan fa neih hi an duh mang tawh hauh lo mai a. “Kan thawhchhuah sum leh pai chu kan nawmna tur atan leh kan ei in atan a ni tur a ni,” tih ngaihdan an nei bur mai. Ngaihdan tha lo tak mah nise, Extreme Secularism emaw Neo-Modernism emaw an kalpui nasa tawh lutuk hian Zopa ngaihdana thil atthlak tak an nunpui a ni ta ber. 1960 velte khan chuan homosexual hi police ten an zawng a, an man zat zat peih a. Cheng tam tak chawi emaw lung in hial emaw tan theihna dan an lo siam tawh. 1990 hnu lamah chuan Courtah thutlukna siam tumin an inbei a, fa neih tum hauh lo nupa pangngai an tam ve ngang avangin chithlahna tur a nih chuang loh ahnu engnge a danglamna, tih point hmangin homosexuality chuan zalenna a chang ta a ni. Chutih hnu pawh chuan a lang a pauvin an la ti ngam chaih lo na a, kum 2000 hnu lamah chuan  court-ah inneih pawh an lo ngam a. Organization hial an din nghe nghe. Mahse kohhran thenkhatte chuan courtin a phal hnu pawh chuan nupaah an la ziak lut thei chuang lo. Tin Sorkar court meuhvina a phal chu tia kohhran hming lista nupa registera ziak lut te pawh chuan kohhranah eng mawhphurhna mah pek an la duh chuang lo tho tho. Kohhran inti hawizau deuh chuan rawngbawlna lama mawhphurhna a te a lian pe duh si lovin kohhran huang chhunga inneih erawh an lo phalsak vel thung bawk a, a ni nuai mai. Hot issue tak tak a ni ta. Tun chu Mizo khawvela a awmna chhan leh an dinhmun tur lamah lut dawn ila.

Zofate khawvelah nupa dik tak fa neih duh miah lo kan la awm lo. Fa neih theih loh vanga inthente lam lam kan la tam zaw mah. A nih serh kan neih kawp a, mi ina nei nia min hriat mi zawk kha keimahnia a chak lo zawk niin a pakhat zawk hormone kan lo nei tam a, kan kawppui tur dik tak, mi min ngaiha dik lo, chu kan nei ta zawk nge? Chutiang ni sela serh neih kawp hi chu mi singkhatah pakhat pawh kan piang si lo. A nih mipa ni si kha kan pa thei lova, hmeichhe hormone a tam zawk avangin kan lo nu a, mipa tho kan ngai na nge. Ti ila mipa leh mipa innei chu kan mang lo lawi a.

A nih chuan homosexual hovin kan Zofate society-ah chuan chhuanlam tur an va van dawn em. Nia, a vang khawp mai. Mipa inti hmeichhia leh hmeichhia inti mipa khawi khua an ti emaw kha le, te pawh an innei a, an pa zawk a rai pawp mai an tih kha. A nih chuan mipa intihmeichhia khan a pawl a ni zawk ngei ang. Chuti nise a thil chu a nung tihna a niang a, sex nihna hai vang chu a ni lovang.

Thil awm thei nia lang chu nu leh pate enkawlna a ni mai lawng maw? tih hi a ni. Kan fapa awt lutukin fanu pawh kha kan mipa chei ta chiam pek a, a lo len thlengin a sex nihna hai miah chuang si lovin a pa ta a ni lo maw? A nih loh vek leh kan hmeichhe awt lutukin fapa a lo piang ta si a, kan hmeichhe chei zui a, a nu zo ta vek hi a ni lo maw? Hetiang a nih chuan nu leh paten kan tifuh lo liau liau a ni ang. Kan fa awh chu a eng zawk pawh va ni sela a rawn pianga kha a nih dan ang takin kan cheibawl tho tur a ni dawn lawm ni.

Heng a chunga mite zawng zawng hi a chhan a nih si loh chuan kan Zofate zinga homosexual ho hi an awm eu ve hrim hrim em ni ang le? Beer dawr thenkhat sex service tikawp te-ah mipa tam takin tuai (mipa intihmeichhia) an hire thin hi chu vawikhat thil tih a tan a ni a. Oral sex an ngainat zawk vang a ni ngei ang. Chu pawh chu nise a dawrtu leh a service petu pawh chu Mizo khawvel tan chuan an uchuak ta tho tho. Ni e, chutah tak chuan inzawrhna market rilru pua chhutsak chuan mipa leh hmeichhe dik tak indawr pawh fa neih nan an ti chuang lova, condom an vuah vek tho alawm, tihin a chhan mai thei.

Amaherawh chu service dawr lamah chuan hmeichhia leh hmeichhia chu an inlei leh hauh si lo. A pawnah mitak satak karah erawh in-nupa hmuh tur an awm nual bawk si. Dawr lama mipa leh mipa indawr emaw hmeichhia leh hmeichhia indawr emaw lam chu thukhat lo nise. Mipa leh hmeichhe dik tak an inpawla leia chi titlak a nih pawh khan Pathian chu a lawm lo a nih kha. Nu leh Pa inpawlna hi nawmchenna mai a ni lo, tih Bible-in min kawhhmuh a nih kha. Tin nu leh nu sex hmang leh pa le pa sex hmangte pawh Korinth khua mite Tirhkoh Paulan a zilhna kan en chuan heng thil hi Pathian duh zawng a ni lo, tih a lang. Zofate Society chhungah hian chuan nupa dik tak fa neih duh lo kan awm mang bawk si lova, chuvangin homosexuality human lam hawi a chhan tha sawi tur point tling a va awm mai lo ve. An awm eu deuh chu a ni. A thu hrimah ka nutei nupui, tih leh ka patea pasal tih vel te, ka ni nupui tih te hi sawi nuam chu a ni lo chiang alawm. A hretu apiangin “I tawngsual a ni lo maw?” an ti ziah a, hmai nghal lo taka sawifiah a ngai fo dawn tlat mai. Zofate khawvel atan chuan a la tlang tla thei rih lo chu a ang. Chutianga a tlangtlak rih si loh chuan kan chhungte leh fate zingah hetiang awm lo tura ngaihsaka an nih tur ang nih tir zel hi mipui leh nu leh pate mawhphurhna a ni rih dawn lawm ni?