Home Minister R Lalzirliana chuan, tunlaia Tuikuk lâk kîr chungchangah helna leh silai nena \an khawh an awm chuan, chung mite chu dîm lo turin police officer-te a chah.
Home Minister hian nimin khan Police Headquarters-ah CBI Academy-in Anti-corruption-a thawkte training a pek hawn pahin, police hna thawk thate hnenah medal a hlan a; Home Minister chuan, "Bru repatriation kan ti mek a, hetih lai hian misual thenkhat, silai eng emaw zat nei, he programme kalpui mek tihbuai tum an awm. Kan ram leh hnam chhan nan leh, inrêlbâwlna a fel zawk nan silai tha kan neih hi a tul anga hman tur a ni," a ti.
R Lalzirliana chuan, hel silai kengte laka a che hmasa zawk ni turin police-te a chah a, "Min tibuai thintute lakah hian a tul anga nasa lehzuala che turin ka chah che u a ni," a ti. Krismas lo thleng turah pawh, dan leh thupek kenkawh lama tan la zel turin police-te a chah a, tlawmngai pawlte nen pawh theihtawpa sual do kawnga hma la turin a ngen a ni.
He hunah hian police hna thawk tha, kum 2008 Republic Day-a Police Medal for Meritoriuos dawngtu - C Laldina, SP, CID (SB); Inspector ARV Pillai, O/C, Vairengte; Lalhruaia, Commandant General, MRHG; SI B Lalvura (Security) te leh, kum 2009 Republic Day-a puan tawh - V Lalthakima, Commandant, 1st. Bn. MAP; RK Daniela, DSP (Prosecution) te hnenah Home Minister hian an medal dawn tur a hlan.
Kum 2009 Independence Day-a medal dawng - Lalbiakthanga Khiangte, SP, Aizawl; kumin Republic Day-a medal dawng - Inspector CP Dahal, ACB leh Inspector Laljohana, CID (Crime)-te hnenah an medal dawn turte Home Minister hian a hlan bawk.
Thulakna: Vanglaini