HIV/ AIDS leh World AIDS Day

HIV Chu Enge?

HIV (Human Immunodeficiency Virus ) chu mihring taksa-a natna dotute (Immune System Cells ) zawi zawia tichhetu natna hrik a ni. HIV hrik chu a inthlaphung tam tial tial thin a, tichuan mihring taksa-a natna dotute chu hnathawk thei lovin a siam thin a ni. Mihring taksa-a natna dotuten hna an thawh tawh loh avangin mihring taksa-ah chuan cancer leh natna chi hrang hrang a lo lut thin a, thihna hial a thleng thin a ni. 

AIDS Chu Enge?

HIV hrikin mihring taksa-a natna dotute a tih chhiat avanga miin natna chi hrang hrang a lo vei hian, chu chu AIDS (Acquired Immune Deficiency Syndrome ) vei, tia sawi a ni thin.

Engtinnge HIV Chu A Inkaichhawn Theih?

HIV chu thisen atang, baw/ chi atang leh hnute tui atangtein a inkaichhawn theih a, inkaichhawn dan langsar zualte chu he’ngte hi a ni:-

·        HIV hrik paite nen inpawlna (zunna serh leh mawngkua hmanga inpawlna a huam ) atangin a inkaichhawn theih. Chuvangin inpawlna atanga HIV kai lo tura inven dan tha ber chu condom hman a ni.

·        HIV hrik paite nen ka-a serh infawhsak, inliahsak, inhmuamsak a, tisa chakna hrikthlak atang HIV a inkaichhawn theih. Hei hi fawh/liak/hmuamtu ka-ah pem leh hliam a awm chauhin inkaihchhawn theih a ni.

·        Hriau leh inchiuna inhmantawm atangin HIV hi a inkaichhawn theih.

·        HIV hrik pai thisen thianghlim lo dawn atangin HIV a inkaichhawn theih. Hei hian thisen inpek mai bakah, inseh,pem leh hliam - HIV hrik paite thisen taksa chhunga a luh theihna zawng zawng a huam.

·        HIV hrik pai nu-in a nau pai laiin emaw, naute pian hnu-a hnute tui a pek  emaw atangin naute chuan HIV a vei thei.

HIV Natna Lo Lan Dan

HIV hrik kai atanga chawlhkar tlem liam hnu-ah, hritlang awmna satliah, khawsik satliah ang a lo chhuak thin. Eng emaw chen hnu-ah natna dang dang a lo lang thin bawk. HIV hrik pai leh pai loh hriat theihna tha ber chu thisen entirna  neih a ni. Chuvangin mahni bul hnai damdawi ina thisen entir a tha ber. HIV hrik hi mihring taksa-a a luh atanga thla thum liam hnu-ah chauh thisenah a lang chhuak thin.

Enkawl Dan

HIV hrik that theitu damdawi a la chhuak lo. HIV hrik inthlahpunga hna thawk tha thei lo tura siam thei damdawi erawh a awm. Chu chuan HIV veite nunna thui tak a pawt sei thei. He’ng damdawite hi ni tin ei chi a ni a, theihnghilh chi a ni lo. Chuti a nih loh chuan, damdawi-in a nghawng tur ang a nghawng pha tawh lo thin a, tangkaina nei lo damdawi-ah a chang mai thin a ni. Doctor te leh mithiamte rawnin HIV damdawi te hi ngaihven a tha.

Khawvel Dinhmun

UNAIDS-in a chhut danin mi mataduai 33.3-in HIV an vei mek a, chu’ng zinga mi maktaduai 2.5 chu naupang an ni. Kum 2009 khan mi maktaduai 2.6-in HIV an vei thar a, AIDS vangin mi maktaduai 1.8 an thi a ni.

World AIDS Day

Ni 1 December 1988 atang khan World AIDS Day hi hman tan a lo ni a, AIDS leh a kaihhnawih thila hman tur sum zawnna atan te, mipui hriata AIDS chungchang finna thehdarhna atan te, AIDS chungchanga ngaihdan dik lo dona leh zirna tihhmasawnna atante he ni hi hman thin a ni. World AIDS Day hian kum tinin thupui a nei thin a, World AIDS Day 2010 thupui Universal Access and Human Rights’  tih a ni.

World AIDS Day 2010 thupui 'Universal Access and Human Rights' tih hian mihring dikna chanvo dik tak a nih angin, khawvel puma HIV/ AIDS veiten enkawl, venhim leh ngaihsak an hlawh ngei theihna a kawk.

World AIDS Day Thupui An Lo Hman Tawhte leh Hman Kumte

·        1988 – Communication

·        1989 – Youth

·        1990 - Women and AIDS

·        1991 - Sharing the Challenge

·        1992 - Community Commitment

·        1993 – Act

·        1994 - AIDS and the Family

·        1995 - Shared Rights, Shared Responsibilities

·        1996 - One World. One Hope

·        1997 - Children Living in a World with AIDS

·        1998 - Force for Change: World AIDS Campaign With Young People

·        1999 - Listen, Learn, Live: World AIDS Campaign with Children & Young People

·        2000 - AIDS: Men Make a Difference

·        2001 - I care. Do you?

·        2002 - Stigma and Discrimination

·        2003 - Stigma and Discrimination

·        2004 - Women, Girls, HIV and AIDS

·        2005 - Stop AIDS. Keep the Promise

·        2006 - Stop AIDS. Keep the Promise – Accountability

·        2007 - Stop AIDS. Keep the Promise – Leadership

·        2008 - Stop AIDS. Keep the Promise - Lead - Empower – Deliver

·        2009 - Universal Access and Human Rights

·        2010 - Universal Access and Human Rights

World AIDS Day-ah Enge I Tih Ve Theih?

World AIDS Day-ah hian HIV/ AIDS veite leh HIV/ AIDS kaihhnawih thil tan tih theih tam tak i nei. Sum leh pai emaw, tha emaw, tawngkam emawa HIV/ AIDS veite tanpuina pek, HIV/ AIDS chungchanga hriatzauna midangte hnena thehdarh, HIV/ AIDS tanpui/ buaipui pawl zawma an thiltihna-a tel, AIDS/ HIV campaign chhinchhiahna Red Ribbon siama khaw laia vahchhuahpui leh tawngtai te hi a ni. He’ngte bakah mahni awmna leh hmun azira mahni remhriat dana tih theih tam tak a awm thei ang.

Thulaknate:

1)    HIV by Dr.Gill Jenkins

2)    MSAC

3)    International HIV & AIDS Charity

4)    Wikipedia

5)    BBC Health