Facebook-in Messages Service Tichhuak, E-mail Indopui A Chhuak...

Ni 15 November 2010 khan Palo Alto, California, United States-ah khawvel social network lar ber, mi maktaduai 500 chuangin an hman Facebook chuan Messages inthawnna (e-mail ang ...@facebook.com leh Internet Message Access Protocol support tel ) chu a tlangzarh. Tlangzarhna-ah Facebook dintu Mark Zuckerberg-a chuan, “E-mail chuan a hun a hmang tawh a, tunlai hun thar khawvela hman atan e-mail chu a muang lutuk tawh. Tunlai khawvel hun thara thangtharte tana messages inthawnna tur chu e-mail a nih kan ring lo a ni,” a ti. He Facebook messages service thar hi tunah hrih chuan mi nazawng hman theiha tihchhuah a la ni lova, thlan bik mi tlemte chauhin an la hmang chhin rih a ni.

Tunlai hian Facebook leh Google  chuan khawvel Web lalram an inchuh nasa hle a, Mark Zuckerberg-a chuan Facebook messages system thar hi e-mail dang el nana siam a nih loh thu sawi bawk mah se, mi tam tak chuan Facebook chhungkua-ah chuan tun tuma Facebook messages service thar hi “Gmail thattu (Gmail Killer )” tiin an ko, niin an sawi.

Facebook-in messages service thar a siamchhuak hi khawvel mipuiin an hman nasat ber e-mail - Windows Live Hotmail, Yahoo! Mail, Gmail leh AOL Mail te tan chona nasa tak a ni a, “E-mail Indopui ” a chhuak dawn ta em ni? tih hi zawhna lian tak a ni thei ang.

Altimeter Group-a zirchianga tehtu Charlene Li-i chuan, “Windows Live Hotmail, Yahoo! Mail, Gmail leh AOL Mail te tan chuan hlauhthawnawm tak a ni a, Facebook messages service thar hi a hlawhtlin viau chuan khawvel puma e-mail hmangtuten an e-mail an hmang khat tual tual ang a, Windows Live Hotmail, Yahoo! Mail, Gmail leh AOL Mail ten thihna lui kawrruam an zawh mai thei a ni,” a ti. Chutih rual chuan chhut-chiangtu tam tak chuan, messages kal kual vel enkawl chungchangah te, spam chungchangah te leh thil dang tam takah Facebook hian harsatna hmachhawn tur tam tak a neih thu an sawi. Tin, mi thenkhat chuan, “Tun tuma Facebook messages service thar hi thil thar tehchiam a ni love, Web lalram awptu Google tihdan entawnin, ‘...@gmail.com’ aiah ‘...@facebook.com’, ‘Google talk’ aiah ‘Facebook chat’, ‘Google voice’ aiah ‘SMS’ a hmang a ni ve mai ” an ti bawk.

Facebook Messages leh Email System Thar Hnathawh Dan Thlir Thuakna

1.Engtin nge facebook messages thar ka neih theih ang?

*Heta tang hian Facebook messages thar dil theih a ni:-

https://www.facebook.com/about/messages/

*I dilna pawm a nih hnu-ah pop-up window a lo lang ang a, “See What’s New ” –ah i lut ang a,  Messages zir thuakna i thlir thei ang. Tichuan, Messages thar i duh thu i nemnghet (comfirm) dawn nia.

2.Engtin nge Facebook email address thar ka neih theih ang?

*Facebook Messages service thar i neih rual khan Facebook chuan Facebook e-mail address pawh nemnghet nghal turin a sawm ang che a, hming atan tuna i Facebook account hming ang deuh deuh kha a rawn lang ang a, i duh ber i thlang thei ang. I duh ang hming a awm lo a nih pawhin i duhzawng hming i ziah a, i thlanna tur box a awm tho ang.

3. Facebook messages leh email ka neih hnu-ah...

*Messages leh email thar i neih hnu-a i tih hmasak ber tur chu, inboxes/ folders thlir hrana hming pek a ni. I Facebook thiante atanga lo kal message zawng zawng chu i “inbox ”-ah a lut ang a, Facebook group leh page i duh (like)-ho leh hmun dang atanga lo kal message reng reng chu “others ”-ah a lut ang.

*Facebook messages thar hian chat tool changkang tak a support a, hmel lang pawhin a inbiak theih ang. I messages chu i phone number nen pawh i thlun zawm thei ang a, i thiante mobile-ah pawh lehkha i thawn thei dawn a ni. Email dangah lehkha i thawnchhuak thei ang a, email dang atangin lehkha i dawng thei bawk ang. Tin, “privacy settings” atangin tuten nge lehkha thawn thei che – “Mi zawng zawng/ I thiante thiang lehchhawng/ I thiante chauh? ” tih i siam thei.

Thulakna:

-The New York Times

-Fox News

-CNN

-Search Engine Land

-Facebook

-Tested

-Email Marketting Report