E-Bay Thil Zawrh leh Hralh Maksakte

Engnge e-bay chu kan lo ti mai thei a, internet kaltlanga thil zawrh chhuah leh hralhna hmun a ni a, bungraw pho chhuah reng rengte hi lilam hmanga hralh chhuah a ni vek thin a, tih fuh chuan thil tha tak tak man tlawm takin a lei theih a, tih fuh loh chuan thil tha lem lo tak pawh manto takin a lei theih ve bawk.

Nuclear kah chhuahna hmun:

Nuclear ralthuam nei ramte hian an nuclear ralthuam dahna hi an zep ru tlat a ni ngai a, America rama nuclear kah chhuahna hmun pakhat chu e-bay ah hian zawrh chhuah a ni vung mai! Kum 2007 khan he nuclear kah chhuahna hmun (nuclear missile silo) hi lei theih a pho chhuah a ni a, hei hi dan kalh a ni. Hei hi Central Washington-a Larsen Air Force Base a awm niin ram acre 57 a zau leh in awmsa a ni a, lei hnuai kawng feet 100 chuang a awm tel bawk a ni. Lilamnaah chuan US dollar maktaduai 1.5 zeta ngam an awm hman a ni.

Ram zuar!:

Kum engemaw ti kalta khan ram (country) pakhat chu zawrh a ni a, a zuartu hi Gerrit Six niin Belgium-a zirtirtu hna tawk a ni a, a ram zawrh hi ama ram, Belgium a ni. Belgium hi hralh theih ni lo mah se a zawrh chhan hi politics-a hlemhletna nasat lutuk vang a ni a, Euro maktaduai 10 a lei tum an awm hman a ni awm e.

Beethoven-a samzai lunghlu: He lunghlu hi a pawl raih a, a nalh hle bawk a, khawvela musician ropui bera ngaih Beethoven-a samzai atanga siam a ni. He lunghlu hi Life Gem kut chhuak a ni a, carat chanve leka rit niin dollar maktaduai khata hralh a ni.

Nupui lilam:

Tlat mai a! e-bay a mahni nupui ngei han zawrh tak mai chu! Brazil-a mi pakhat chuan a nupui chu lilam turin a zuar chhuak a, dollar 55 atanga chhan tan tur a la ti zui! Mahse nupui zawrh hi human traffickling nen a inzul avangin phal loh a ni a, a nupui a hralh hma hian Brazil police te chuan a an tihtawp sak hman hram a ni.

Shakespeare-a lemchan bu:

William Shakespeare-a lemchan thawnthu pakhat Pericles bu, kum 340 zeta upa pawh hi hralh chhuah a lo ni tawh a. He lehkhabu hi Shakespeare-a kut chhuak an tih chhuah zinga la hmuh theih zingah chuan a hlui ber pawl a ni a, kum 1666-a London a kan vak tum pawh kha a lo paltlang ngat tawh a ni, kum 2003 khan e-bay ah hian zawrh chhuah a ni a, £5,000,000 a hralh a ni a, hemi kuma an thil hralhah chuan a to ber a ni.

Lawng:

Lawng han tih lemah mihring emaw bungraw phur luk luk chi ni lovin nuam tlawlna lawng, yacht an tih chi hi a ni a, mi hausaho hian an uar khawp mai. Kum 2006 khan yacht pakhat feet 405 a sei chu 4Yacht ten an rawn pho chhuak a, dollar maktaduai 85 a hralh chhuah a ni a, e-bay kaltlanga bungraw hralh to ber a ni bawk. 4Yacht hian he lawng hi $168,000,000 in an lei a, $85 million hian an hralh leh ta a ni. He lawngah hian helicopter dahna te, VIP awmna bik tur pindan nuam tak tak 14 te a awm a ni.

Thulakna: Vengthlang YMA Palai, Vol. XX No.10 13th March 2011