CENSUS CHUNGCHANG SAWIHO, CHHUNGKAW 1355 TEN 'SAKAWLH' HLAU

Population Census of India 2011 thawhkhatna leh hemi ruala National Population Registeration (NPR) neih meka hmalak tawhna te leh harsatna tawh te sawiho turin vawiin khan Chief Secretary Pu Vanhela Pachuau hovin GAD Commissioner Pu C.Lalsawta leh Census Operation officials te bakah District zawng zawng D.C. te, tlawmngai pawl leh kohhran aiawh ten I&PR Conference Hall-ah meeting pawimawh tak an nei.

Mizoram-ah chuan Census thawhkhatna hi kumin May ni 15 atanga tan a ni a, June ni 30-ah zawh a ni ang. Vawiin meeting-ah hian D.C. zawng zawng ten an district theuha an hmalakna leh hna zawhfel tawh chin an sawinaah district zawng zawng-ah harsatna an tawh lian ber chu ‘Sakawlh’ hlauh vanga Census-a inziak lut duh ve lo chhungkaw 1355 la awm tlat te chu an nih thu an tarlang. Tun dinhmunah chuan Census-a inziak lut duh lo district tina chhungkua awm zat chu :- Aizawl District huam chhungah chhungkaw 400 chuang, Lunglei District-ah chhungkaw 106, Kolasib District-ah chhungkaw 328 (heng zinga mi 13 te chu sorkar hnathawk an ni), Lawngtlai District-ah chhungkaw 173 (sorkar hnathawk mi 5 telin), Serchhip District-ah chhungkaw 50, Champhai District-ah chhungkaw 167, Saiha District-ah chhungkaw 64 leh Mamit District chhungah chhungkaw 18 te an ni.

Meeting kaihruaitu Chief Secretary chuan Census hi rampumah kum 10 danah neih ziah a nih thu leh Census Act, 1948 chuan India ram khua leh tui ni tawh phawt te tan chuan tih makmawh a ni a, Census-a inziak lut duh loh te chu he Act Section 11(d) & (g) hmangin Rs.1000/- chuang chawitir emaw kum thum chhung jail tan tir theih a nih thu a sawilang a. Mizorama chhungkua 1355 Census-a inziak duh lo la awmte chu inziahluh hun la hawn chhung ngeia Census awmzia dik tak leh an inziahluh lova thil pawi thleng thei zawng zawng chungchang hrilhfiah a, Census emaw NPR hi hlauh tur engmah a awm loh thu hrilhnawn leh a rawt a ni. District level-ah D.C. ten hma la chhunzawm zel se, khawtlang leh kohhran hruaitute nen tang hova heng chhungkuate Census-a inziah luh tir tura sawm ni leh se tih vawiin meeting-ah an rel a ni. Hun tiam chhunga inziak lut duh lo luih te chu a tul chuan Dan-in a sawi angin hrem an nih tur thu sawilan a ni.

Population Census of India 2011 hi ram chhiarpui vawi 15-na tur a ni a, nakum February-March, 2011 ah peihfel tum a ni. Census hi kum 10 danah zel neih a ni thin a, National Population Registration erawh hi chu mihring an pun ang zela ziah luh belh a ni thei dawn a ni.

Thulakna: DIPR