A khi zopui tlang chhip a sang laiah,
Chuan ka nuam e lunglen niin,
Tah chuan a lang an ti Buannel ram dai,
Chawngtinleri vangkaw tual nuam chu;
Sa tin, hrang tin tual an chaina,
Va tin hram thiam hlim zai vawrna.
Duhaisam zawng a thleng ta ngei,
Zopui tlang chhip chuanin ka thlir;
A lang e, a khi chhaktiang tlangah,
Lunglai khamtu Buannel ram dai,
Mahse thinlai dawn tisei renga’n,
Lung tileng romei a kai chiai e.
Suihlung mu ang a leng kir a,
Nunhlim mual liam an lo lang a;
Buannel ram dai chentu zawngten,
An ngai nem maw hringnun chan hi;
Sâm an chai e, hlim lai chenin,
Vangkhua an rem Buannel ramah.
Zalen lal ram chentu zawngten,
An ngai bil lo lengdang vangkhua;
Mal tin mal za tlanin an puar,
Rethei naufa an awm chuang lo;
Hlim lo fa reng an awm lo ve,
Khuanu ruat reng a lo ni si.
Tunah erawh a dang zo ta,
Buannel vangkhua a dai zo ta;
Thlaler ram dai a chang zo ta,
Khawiah tuan maw kha ang dam sa?
Kirtiang rel hian an mawi si lo,
Chawngtinleri a nuar em ni?
Note: Lentlang dung a Buannel ram hi hmuh ka chak em em thin a. Ni khat chu Zopui tlang atangin “Khi khi Buannel ram a nia” tiin min kawhhmuh a. Chumi tuma ka suangtuahna kal zel chu hlaah ka chantir ta a ni.-Dr.R.L.Thanmawia