Buannel Chanchin Tawi

Buannel hi mi tin pal lohna hmun ania, .Kan pi puten "Sa hi Buannel ah a lo piang a, Chawngtinler’n a siam" an tih avangin, Buannel chu ram hla em ema awm emaw; a nih loh leh ramhuaiho awma rin mei thei a ni reng a.Mahse chu ti chu a ni lo. Run leh Tiau in kar Lentlang sang lai taka awm a ni a. Tiau atangin mel 20 vela hla a ni.A hnaihna ber khua chu Hmunluah khua a ni a, chu khua atang chuan mel 7 vela hla a ni.

Lentlang tluana tlang chip filawr deuh deuh te chu, hmar lam atanga chhiar in Kelchal tlang, Inbuk tlang, Buannel tlang, Muchhip tlang tih a ni. Buannel ram hi tupui ram ril tak a ni a. Lentlang sang lai tak chu tlang then khat te ang a mual bawk ve mai a ni lo va hmar lam atangin chhim hawi in tlang dung a kal ruah mai a. Buannel awmna hmun a thlen dawnin thuang thumin a kal a. Tlang dung inkar chu ruam zawlrai nuam tak mei a ni.Tlangchhip sang lai chu palhung ang meiin, tupui durkhup mai: chatuan ata tuma la kih ngai lohin a hual tlat mai a.Phul leh tu pui inri chinah chuan sih pasarih a awm a,chu sih atang chuan tui fim tak mai a luang chhuak a,an in finkhawm chu lui te tak te ah a chang a.Phul zawl laiah chuan mute thlakawi ang in dam diai mai in a luang a; furah pawh a nu ve zen zen lo.

Chu lui te chu tuipui karah a luang lut a, Khuaimual khua leh tuichirh khaw inkarah a luang thla-fin a. Tiauvah a luang lut a ni. Sih pasarih awmna hmun phul chu Buannel tih a ni a, a chheh vel tupui chu ‘Buannel ram’ tih a ni.

Kan pi pute’n " Sa hi Buannelah a lo piang" an tihna chhan hi: sa a lo tam thin em vang ani mai thei. Buannel ram kawn tha deuh ah chuan sai hum pa ban pil pila thuk a tam mai a. Sai hapui a tam em em mai. Samak, Tumpang, Sail eh Sebawng te chenin sa tinreng tun hma chuan an lo awm tawh thin a. Sava lam phei chu Arawn tih loh chu an la awm kim vek a. Vapual, Vacha, Vakul, Vavu, Vahrit, Vahai, Vakhua kawihawk leh riakmaw chenin an la tam mai.

Buannel ram hi ram mak tak nih chu a tling ve reng reng a ni. Tupui lai chu chhunah pawh dumde leng chum chum a mawi hian a dur thim khup a. Thing hrawl pui pui sang tak tak an ngur khup mai a. Atlangsanglai hmunah vet hung chuan thing chu patling chen awm lek lek an ni vek a, patina tuam nguai mai bawk a; patling pawm tawk ni awma lang pawh hi han kheihfai meuh chuan chawnpuar tia emaw lek a ni mai thin.

Tlang chip phulah chuan pangpar mawi tak tak a khat tlat mai a; dingdi leh hawilo par a tam ber. Tlangpurun ( runpheng) pawh a tam hle mai. Thal lai chuan romeiin a bawm chiai mai a; furah chuan chhumin a bawm reng thung. Ruah a tam hle a, hmun dangah a sur vak loh lai pawhin fur lai chuan a sur deuh reng thin.