Mizo Academy of Letters (MAL) chuan nimin khan Central YMA Hall-ah Foundation Day vawi 46-na an hmang a, Art & Culture Minister, PC Zoram Sangliana'n a hmanpui. Khuallian hian Book of the Year 2009 - Rintei Zunleng tih ziaktu, Lalrammawia Ngente hnenah chawimawina thuziak leh Rs. 5,000 a hlan.
PC Zoram Sangliana chuan, lehkhabuin hnam a tihpumkhat thu sawiin, "Mizo tawnga lehkhabu kan chhuah hian Mizo hnahthlak, Mizoram chhehvela awm zawng zawngte'n an lo chhiar a; Mizo tawng hmanna kawngah zawi zawiin min tipumkhat a ni," a ti a; ram changkang apiangah lehkhabu dah khawmna (library) ngaih pawimawh a nih thin thu a sawi.
MAL Foundation Day hi an President, Lalthangfala Sailo-in a kaihruai a, chawhnu lamah Book of the Yaer ziaktu, Lalrammawia Ngente leh Brig. Ngurliana Sailo kawmna hun an hmang.
Book of the Year Sub-Committee Secretary Zaithangpuii Vuangtu report pek danin, kum 2009 chhungin an hriat theih chinah Mizo irâwm chhuak lehkhabu 162 tihchhuah a ni a. Book of the Year thlan tur atan hian an lehkhabute thehlut tura an ngen angin, mi 45-in an thehlut a, a bâk zawng chu lehkhabu dawr leh publisher-te hnen atangin an lei a ni.
Thulakna: Vanglaini